हिंगोली- नागनाथाचे दर्शन घेऊन परतणाऱ्या भाविकांच्या दुचाकीला भवानीदेवी माळाजवळ ट्रकने पाठीमागून धडक दिली. यामध्ये दोनही दुचाकीस्वारांचा जागीच मृत्यू झाला आहे. दोघेही पूर्णा तालुक्यातील धार-वाई गावचे रहिवासी आहेत.
वामन सुर्वे (35), चांदजी पवार (38 ) अशी अपघातग्रस्तांची नावे असून, ते आठवे ज्योतिर्लिंग असलेल्या औंढा नागनाथ येथे पहिल्या श्रावणी सोमवारी देवदर्शनासाठी गेले होते. दर्शनावरून परतताना शिरड-शहापूर जवळील भवानी देवी माळाजवळ औरंगाबादकडे जाणाऱ्या ट्रकने त्यांच्या दुचाकीला जोराची धडक दिली. अपघातानंतर डोक्यातून अतिरक्तस्राव झाल्याने दुचाकीस्वारांनी जागीच दम तोडला.