गडचिरोली - मंगळवारी सकाळी 11 ते 12 वाजताच्या सुमारास महाराष्ट्र-छत्तीसगड सीमेवरील येलदळमी डोंगरावर नक्षलवादी आणि पोलिसांमध्ये चकमक उडाली. या चकमकीत कुठलीही जीवितहानी झाली नाही. नक्षलवाद्यांनी लावलेला अँबूश मोडून काढत सी-60 चे जवान बाहेर पडल्याने मोठा अनर्थ टळला. घटनास्थळावरून मोठ्या प्रमाणात नक्षली साहित्य जप्त करण्यात आले आहे.
येलदळमी डोंगरावर नक्षलवाद्यांचा घातपात उधळला; गडचिरोलीत पोलीस-नक्षल चकमक
महाराष्ट्र-छत्तीसगड सीमेवरील येलदळमी डोंगरावर नक्षलवादी आणि पोलिसांमध्ये चकमक उडाली. नक्षलवाद्यांनी लावलेला अँबूश मोडून काढत सी-60 चे जवान बाहेर पडल्याने मोठा अनर्थ टळला. घटनास्थळावरून मोठ्या प्रमाणात नक्षली साहित्य जप्त करण्यात आले आहे.
संग्रहित छायाचित्र
गडचिरोली जिल्हा पोलीस दलाचे सी-60 जवान एटापल्ली तालुक्यातील गट्टा-कोठी मार्गावरील महाराष्ट्र-छत्तीसगड सीमेजवळील येलदळमी डोंगरावर कोम्बिंग ऑपरेशन राबवत होते. मात्र, याचवेळी नक्षलवाद्यांनी लावून ठेवलेल्या अँबूशमध्ये जवान अडकले. यावेळी नक्षलवादी व पोलिसांमध्ये चकमक उडाली. मोठ्या प्रयत्नानंतर सी-60 जवानांनी अँबूश मोडून काढत बाहेर पडले. त्यामुळे मोठा अनर्थ टळला. पोलीस जवानांचा वाढता दबाव पाहुन नक्षलवादी घनदाट जंगलात पसार झाले.
जवानांनी घटनास्थळाची पाहणी केली असता घटनास्थळाहून मोठ्या प्रमाणात नक्षली साहित्य आढळून आले. तसेच सर्व साहित्य जप्त करण्यात आले असून आताही त्या परिसरात पोलीस जवानांकडून कोम्बिंग ऑपरेशन सुरू असल्याची माहिती पोलीस सूत्रांनी दिली.