गडचिरोली - नक्षलवाद्यांनी आज (19 मे) रोजी पुकारलेल्या बंदला गडचिरोलीतील अनेक गावकऱ्यांनी विरोध केल्याचे दिसून येत आहे. गावकऱ्यांनी स्वतः पुढाकार घेत नक्षलवाद्यांनी लावलेले बॅनर काढून टाकत बॅनरची होळी केली व घोषणा दिल्या.
गडचिरोलीत गावकऱ्यांनी केली नक्षली बॅनरची होळी; 'नक्षल बंद'ला विरोध - naxal attack
नक्षलवाद्यांनी बंदच्या नावाखाली एटापल्ली तालुक्यातील गुरुपल्ली ते करेम फाट्याच्या दरम्यान झाडे पाडून बॅनर लावून रस्त्यावरील वाहने अडविण्याचा प्रयत्न केला. परंतु, याला गावकऱ्यांनी स्वतः विरोध दर्शवित नक्षलवाद्यांनी रस्त्यात पाडलेल्या झाडांना बाजूला करून नक्षल्यांनी लावलेल्या बॅनर्सची होळी केली.
गडचिरोली
नक्षलवाद्यांनी 'लोकसभा सार्वत्रिक निवडणूक २०१९'च्या मतदान प्रक्रियेवर बहिष्कार टाकण्याचे आवाहन केले होते. मात्र, गडचिरोलीतील दुर्गम व अतिदुर्गम भागातील जनतेने त्यांचे आवाहन मोडीत काढत स्वतःहून घराबाहेर पडून मतदानाचा हक्क बजावून लोकशाहीला आपला पाठींबा असल्याचे दाखवून दिले होते. यामुळेच महाराष्ट्र राज्यात सर्वांत जास्त मतदानाची टक्केवारी ही गडचिरोली जिल्ह्यात नोंदवली गेली होती.