दिलासादायक! गडचिरोली जिल्ह्यातील बारापैकी अकरा तालुके कोरोनामुक्तीच्या दिशेने

गडचिरोली जिल्ह्याची कोरोनामुक्तीकडे वाटचाल सुरू झाली आहे. गडचिरोली तालुका सोडून इतर 11 तालुक्यात आत्तापर्यंत बाहेरून आलेले 131 रुग्ण कोरोनाबाधित आढळून आले होते. त्यापैकी 108 रुग्ण कोरोनामुक्त झाल्यामुळे त्यांना घरी सोडण्यात आले आहेत. तर, उर्वरित सर्व रुग्णांमध्ये सद्या लक्षणे नसल्याने तेही लवकरच कोरोनामुक्त होतील असा विश्वास आरोग्य विभागाने वर्तवला आहे.

गडचिरोली :जिल्ह्यातील 12 पैकी 3 तालुक्यात सध्या एकही सक्रिय रुग्ण नाही तर, पाच तालुक्यात एक ते दोन सक्रिय रुग्ण आहेत. उर्वरित तीन तालुक्यात सहा किंवा सहापेक्षा कमी रुग्ण सक्रिय आहेत. त्यामुळे गडचिरोली जिल्ह्यातील 12 तालुक्यांपैकी 11 तालुके कोरोनामुक्तीकडे वाटचाल करत आहेत. जिल्ह्यातील एकूण सक्रिय 251 रुग्णांपैकी 229 एकट्या गडचिरोली तालुक्यातील आहेत. यामध्ये सुरक्षा दलातील कोरोनाबाधित जवानांचा समावेश मोठया प्रमाणात आहे. इतर तालुक्यात फक्त 22 कोरोनाबाधित सद्या उपचार घेत आहेत.

गडचिरोली तालुका सोडून इतर 11 तालुक्यात आत्तापर्यंत बाहेरून आलेले 131 रुग्ण कोरोनाबाधित आढळून आले होते. त्यापैकी 108 रुग्ण कोरोनामुक्त झाल्यामुळे त्यांना घरी सोडण्यात आले आहेत. तर, उर्वरित सर्व रुग्णांमध्ये सद्या लक्षणे नसल्याने तेही लवकरच कोरोनामुक्त होतील असा विश्वास आरोग्य विभागाने वर्तवला आहे. कोरोना कोविड सेंटर (सीसीसी) वडसा येथे 3, अहेरी 0, सिरोंचा 1, चामोर्शी 4, कुरखेडा 2, धानोरा 6, मुलचेरा 0, एटापल्ली 1, भामरागड 2 तर, गडचिरोली येथील वेगवेगळया तीन कोविड-19 रुग्णालयात 229 रुग्णांवर उपचार सुरू आहेत. तर, अहेरी, आरमोरी व कोरची या तालुक्यात एकही कोरोना रुग्ण सद्या उपचारात नाही.

जिल्ह्यात 429 रुग्णांपैकी 177 रुग्णांनी आत्तापर्यंत कोरोनावर यशस्वीपणे मात केली आहे. तर सिरोंचामधील एका रुग्णाचे निदान व मृत्यू हैदराबाद येथे झाला आहे. तर, एकूण 429 कोरोनाबाधितांमध्ये 293 सुरक्षा दलातील जवानांचा समावेश आहे. हे सर्व जवान जिल्ह्याबाहेरून बाधित होवून आले असल्याचे आरोग्य विभागाने कळवले आहे. यामध्ये राज्य राखीव दल 201, केंद्रीय राखीव दल 88, बीएसएफ 2 व पोलीस 2 अशा प्रकारे जवानांचा समावेश आहे. तसेच एकूण 429 रुग्णांपैकी राज्याबाहेरील 83, जिल्ह्याबाहेरील 210 व बाहेरून आलेल्या परंतू स्थानिक 136 नागरिकांचा समावेश आहे.

आजपर्यंत 12 हजार कोरोना चाचण्या

जिल्हयात इतर जिल्ह्यातील लोकसंख्येच्या तुलनेत मोठया प्रमाणात कोरोना चाचण्या करण्यात आल्या आहेत. आत्तापर्यंत 11 हजार 993 चाचण्या घेण्यात आल्या. यामध्ये आरटीपीसीआरीसह इतर ट्रुनॅट 740 व आरएटीआय (RATI) 39 तपासण्यांचा समावेश आहे. यापैकी 11 हजार 288 चाचण्या नकारात्मक आलेल्या आहेत. चाचण्यांच्या जास्त संख्येमुळे कोरोनाबाधित रुग्ण तातडीने शोधण्यास मदत होते. यातून जिल्ह्यात कोरोना संसर्गावर वेळेत नियंत्रण ठेवण्यात प्रशासनाला यश येत आहे.