गडचिरोली जिल्ह्यातील ११६ पोलीस अधिकारी-कर्मचाऱ्यांना पोलीस महासंचालक पदक

पोलीस महासंचालक कार्यालयाकडून गडचिरोली जिल्ह्यातील ११६ पोलीस अधिकारी-कर्मचाऱ्यांना आज (गुरुवारी) पदक जाहीर करण्यात आले. महाराष्ट्र दिनी (1 मे) सर्व अधिकारी व कर्मचाऱ्यांना हे पदक बहाल करण्यात येणार आहे.

गडचिरोली - पोलीस दलात उत्तम कामगिरी केल्याबद्दल पोलीस महासंचालक कार्यालयाकडून गडचिरोली जिल्ह्यातील ११६ पोलीस अधिकारी-कर्मचाऱ्यांना आज (गुरुवारी) पदक जाहीर करण्यात आले. महाराष्ट्र दिनी (1 मे) सर्व अधिकारी व कर्मचाऱ्यांना हे पदक बहाल करण्यात येणार आहे. महासंचालक पदकामध्ये दरवर्षीप्रमाणे यावर्षी देखील गडचिरोली जिल्हा पोलीस दलाने सर्वाधिक पदक प्राप्त झाले आहेत.

गडचिरोली जिल्ह्यातील पोलीस अधिकारी

गडचिरोली पोलीस दलाने कोणताही अनुचित प्रकार घडू न देता पार पाडलेल्या लोकसभा व विधानसभेच्या निवडणका, वर्षभरात नर्मदासारख्या २२ जहाल नक्षलवाद्यांना केलेली अटक, एके-४७ सह आत्मसमर्पण करणाऱ्या जहाल नक्षली विलास कोल्हासह वर्षभरात ३५ नक्षलवाद्यांनी केलेले आत्मसमर्पण, वर्षभरात ९ नक्षलवाद्यांचा खात्मा आणि नक्षलविरोधी लढ्यात केलेल्या इतर उल्लेखनीय व उत्कृष्ट कामगिरीमुळे पदक जाहीर करण्यात आले आहे.

या अधिकाऱ्यांना पदक
पदक जाहीर झालेल्या अधिकाऱ्यांमध्ये पोलीस अधीक्षक शैलेश बलकवडे, अप्पर पोलीस अधीक्षक मोहितकुमार गर्ग, अजयकुमार बन्सल, यांच्यासहीत ४ उपविभागीय पोलीस अधिकारी, ०३ सहायक पोलीस निरीक्षक, २१ पोलीस उपनिरीक्षक, ०७ सहाएक फौजदार आणि ७८ कर्मचारी यांचा समावेश आहे.