बुलडाणा -मी कुणालाही तुरूंगामध्ये टाकण्यासाठी प्रतिष्ठा पणाला लावलेली नाही. आपण फक्त विकासावर भर दिला आहे. 'सबका साथ, सबका विकास' हाच माझा ध्यास आहे, असे प्रतिपादन आमदार अॅड. आकाश फुंडकर यांनी केले. खामगाव येथे झालेल्या मुस्लिम समाज बांधवांच्या विजय संकल्प मेळाव्यात फुंडकर बोलत होते.
भाजप-शिवसेना महायुतीचे खामगाव विधानसभा मतदार संघाचे उमेदवार अॅड. आकाश फुंडकर यांच्या समर्थनार्थ सोमवारी खामगाव येथे मुस्लिम समाजाचा भव्य मेळावा संपन्न झाला. या मेळाव्याला आमदार आकाश फुंडकर यांनी संबोधित केले.
खामगाव मतदार संघात मी निवडून येण्याआधी मुस्लीम बहुल भागात विकास कामे झाली नाहीत. त्यामुळे मुस्लीम समाज बांधवांची अवस्था वाईट झाली होती. त्यामुळे 'सबका साथ, सबका विकास' या केंद्र शासनाच्या धोरणानुसार मुस्लीमबहुल वस्त्यांसह संपूर्ण मतदार संघात मुलभूत सुविधांची कामे केली. या विकास कामांमुळे फक्त 5 वर्षात मतदार संघाचा चेहरा-मोहरा बदलू लागला आहे. येणा-या काळात दुप्पट कामे करून मतदार संघ समस्यामुक्त केल्याशिवाय राहणार नाही. आमदार नाही तर कामदार होऊन काम करण्याचा संकल्प आहे, असे अॅड. आकाश फुंडकर यांनी सांगितले.