बुलडाणा -चिखली एमआयडीसीमधील महाबीज महामंडळाच्या गोदामात ट्रॅक्टर पलटी होऊन एकाचा मृत्यू झाला. याच अपघातात इतर सहाजण जखमी झाले आहेत. ट्रॅक्टरमधून सोयाबीन घेऊन येत असताना मिरा इंडस्ट्रीजजवळ ही घटना घडली. शेख शब्बीर शेख (वय-५०) असे मृत्यू झालेल्या हमालाचे नाव आहे.
शेख जमील शेख चांद (वय ४०), बाळू सोनाजी इंगले (वय ३६), वाजिद सय्यद जावेद (वय २७), सुनील रक्ताडे (वय २७), शेख शाहिद शेख जुलकर्नैन (वय ३२), शायद काज़ी (वय ३८) हे जखमी झाले आहेत. जखमींना चिखली येथील ग्रामीण रुग्णालयात दाखल केले आहे. घाम गाळणाऱ्या हमालांना बांधकाम कामगार महामंडळासारखीच मृत्यूपूर्व आणि नंतर मिळणाऱ्या शासकीय सुविधा देण्यात याव्यात. महामंडळकडून हमालांचे विमा आणि मृत्यू पावलेल्या व्यक्तीला व जखमींना आर्थिक मदत मिळावी अशी, मागणी हमालांच्या कुटुंबांनी केली आहे.