बुलडाणा - महाजनादेश यात्रेच्या निमित्ताने शेगावात आलेल्या मुख्यमंत्र्यांच्या वाहनांच्या ताफ्यात एका युवकाने अनावधानाने दुचाकी घुसवण्याचा प्रयत्न केला. यामध्ये ताफ्यातील एका वाहनाची तरूणाला जोरदार धडक बसल्याने तो किरकोळ जखमी झाला असून, पोलीस संबंधित व्यक्तीची चौकशी करत आहेत.
महाजनादेश यात्रेच्या निमित्ताने शेगावात आलेल्या मुख्यमंत्र्यांच्या वाहनांच्या ताफ्यात एका युवकाने अनावधानाने दुचाकी घुसवण्याचा प्रयत्न केला. दुसऱ्या टप्प्यातील महाजानदेश यात्रा आज (24 ऑगस्ट) ला शेगावात पोहचली होती. यावेळी देवेंद्र फडणवीस हे श्री संत गजानन महाराजांच्या दर्शनासाठी मंदिरात पोहचले. मंदिरातून परतताना त्यांच्या वाहन ताफ्यात मंदिराजवळ युवकाने स्वत:ची दुचाकी घुसवण्याचा प्रयत्न केला. यामुळे ताफ्यातील एका वाहनाची त्या युवकाच्या गाडीला जोरात धडक बसली. यावेळी मुख्यमंत्री फडणवीस हे अपघातग्रस्त वाहनापासून तिसऱ्या क्रमांकाच्या गाडीत होते. युवकाच्या मोटार सायकलला धडक बसताच ताफा अचानक थांबला.
पोलिसांनी त्वरित घटनास्थळी पोहोचून युवकाला ताब्यात घेतले व ताफ्यासाठी रस्ता मोकळा केला.
