बुलडाणा जिल्ह्यात अंदाजे 64 टक्के मतदान, 59 उमेदवारांचे भाग्य मतदानयंत्रात बंद

जिल्ह्यात विधानसभा सार्वत्रिक निवडणुकीसाठी सोमवारी सकाळी 7 ते सायं 6 वोजपर्यंत मतदान झाले. जिल्ह्यातील सातही विधानसभा मतदारसंघात सायंकाळी 6 वाजेपर्यंत अंदाजे 64 टक्के मतदानाची नोंद झाली.

बुलडाणा -जिल्ह्यात विधानसभा सार्वत्रिक निवडणुकीसाठी सोमवारी सकाळी 7 ते सायं 6 वोजपर्यंत मतदान झाले. संपूर्ण जिल्ह्यात उत्साहात व शांततेत मतदान प्रक्रिया पार पडली. ग्रामीण भागासह शहरी भागातही सकाळपासूनच मतदारांचा उत्साह पाहायला मिळाला. अनेक मतदान केंद्रांवर सकाळपासूनच मतदारांनी रांगा लावल्या होत्या. तर जिल्ह्यातील सातही विधानसभा मतदारसंघात सायंकाळी 6 वाजेपर्यंत अंदाजे 64 टक्के मतदानाची नोंद झाली.

हेही वाचा -सांगलीत मतदानाचा टक्का घसरला; सरासरी केवळ 66 टक्के मतदानाची नोंद...

जिल्ह्यात 59 उमेदवारांचे भाग्य मतदान यंत्रात बंद झाले आहे. त्यामध्ये मलकापूर मतदारसंघात 11, बुलडाणा 7, चिखली 10, सिंदखेड राजा 10, मेहकर 5, खामगांव 12, जळगांव जामोद मतदारसंघात 4 उमेदवार आहेत. जिल्हाधिकारी तथा जिल्हा निवडणूक अधिकारी डॉ. निरूपमा डांगे यांनी प्रशासकीय इमारतमधील मतदान केंद्रात आपल्या मतदानाचा हक्क बजावला. तसेच मतदारांना मतदान करण्याचे आवाहन केले.

हेही वाचा -अक्कलकोटमधील कासेगावाला पाण्याचा वेढा, 700 मतदार मतदानापासून राहणार वंचित?

जिल्ह्यात एकूण मतदानासाठी 2263 मतदान केंद्रे होती. यामध्ये मलकापूर 300, बुलडाणा 335, चिखली 313, मेहकर 348, सिंदखेड राजा 336, खामगांव 316 आणि जळगांव जामोद येथे 315 मतदारकेंद्रांचा समावेश होता. जिल्ह्यातील सर्व विधानसभा मतदारासंघामध्ये 10 टक्के मतदानकेंद्रांवर वेब कास्टींग देखील करण्यात आले. प्रत्येक विधानसभा निहाय मतदारक्षेत्रात प्रत्येकी 1 याप्रमाणे 7 सखी, 7 आदर्श मतदान केंद्रे उभारण्यात आली होती. सर्व एकूण मतदार केंद्रांवर अंदाजे 64 टक्क्यांवर मतदारांनी मतदानाचा हक्क बजावला.

हेही वाचा -विधानसभा निवडणूक : यंदा मतदानाचा टक्का घसरला, अंदाजे ५६ टक्के मतदान

मलकापूर विधानसभा मतदारसंघामध्ये अंदाजे 67, बुलडाणामध्ये 57, चिखलीमध्ये 65.05, सिंदखेड राजा 64.05, मेहकर 62.15, खामगांव 72.03 आणि जळगांव जामोदमध्ये 70 टक्के असे एकूण संभाव्य 64 टक्के मतदान झाले आहे. संबंधित आकडेवारी संभाव्य आहे. यामध्ये मतदान पथके परतल्यानंतर रात्री उशिरापर्यंत अंतिम आकडेवारी मिळणे अपेक्षित असल्याचेही जिल्हा प्रशासनाकडून सांगण्यात आले.

चोख व्यवस्था व बंदोबस्त -

मतदान प्रक्रिया सुलभ होण्यासाठी प्रशासनाकडून सर्व मतदान केंद्रांवर पुरेशा प्रमाणात बॅलेट, नियंत्रण युनिट आणि व्हीव्हीपॅट यंत्रे उपलब्ध करून देण्यात आली होती. सर्व केंद्रांवर एकूण 11 हजार 315 अधिकारी-कर्मचारी यांच्यासह पोलीस, महसूल प्रशासनाने चोख सेवा बजावली.

विधानसभा निहाय क्षेत्रात 24 ऑक्टोबरला मतमोजणी -

विधानसभा निवडणूक 2019 साठी झालेल्या मतांची मोजणी 24 ऑक्टोबरला गुरूवारी सकाळी 8 वाजता सुरू होणार आहे. मलकापूर विधानसभा मतदार संघांची मतमोजणी कृषिउत्पन्न बाजार समिती बेलाड फाटा, बुलडाणा येथे डॉ. बाबासाहेब आंबेडकर सामाजिक न्यायभवन, चिखली विधानसभा क्षेत्रामध्ये तालुका क्रीडा संकुल, सिंदखेड राजा येथे जिल्हा मार्केटींग अधिकारी गोदाम सहकार विद्या मंदीराजवळ, मेहकर येथे महाराष्ट्र राज्य वखार महामंडळाचे गोदाम डोणगांव रोड, खामगांव येथे मातोश्री जयाबेन जिवनलाल मेहता सरस्वती विद्या मंदीर आणि जळगाव जामोद येथे शासकीय धान्य गोदाम याठिकाणी मतमोजणी प्रक्रिया पार पडणार आहे.