कॅनॉलमध्ये बस्तान मांडून बसलेल्या वाघाला जंगलात हुसकावून लावण्यात वन विभागाला यश

तुमसर तालुक्यातील बघेडा/गर्रा गावात वाघाने शेळीची शिकार केल्याची घटना घडली. वाघाने शिकार करून आपल्या भक्ष्यासह बावणथडी कॅनॉलच्या पाईपमध्ये बस्तान मांडले होते.कॅनॉलमध्ये बसलेल्या या वाघाला पाहण्यासाठी बघ्यानी एकच गर्दी केली होती.

भंडारा -तुमसर तालुक्यातील बघेडा/गर्रा गावात वाघाने शेळीची शिकार केल्याची घटना घडली. वाघाने शिकार करून आपल्या भक्ष्यासह बावणथडी कॅनॉलच्या पाईपमध्ये बस्तान मांडले होते. वनविभाग व सेव्ह इकोसिस्टिम अँड टायगर (सीट) टीमला 12 तासांच्या अथक प्रयत्नांनंतर रात्रीच्या सुमारास वाघाला कॅनालमधून जंगलाकडे हुसकावून लावण्यात यश आले.

कॅनॉलमध्ये बसलेल्या या वाघाला पाहण्यासाठी बघ्यानी एकच गर्दी केली होती. तुमसर तालुक्यातील नाकाडोंगरी वनपरिक्षेत्र अंतर्गत पवनारा बिटच्या कंपार्टमेंट नं. 18 मध्ये ही घटना घडली आहे. तेथील बघेडा/गर्रा गावाच्या मोठ्या तलावाजवळील शेतात अर्जुन रामलाल ठाकुर बकऱ्या चारत होते. त्यावेळी वाघाने अचानक कळपावर हल्ला चढवला. कळपातील २ वर्षांच्या शेळीची शिकार करून जवळच असलेल्या बावणथडीच्या उजव्या कॅनलच्या पाईपमध्ये जाऊन बसला. संबधीत मालकाने वनविभाग आणि गावकऱ्यांना या घटनेची माहिती दिली.

वनविभाग व सीटच्या टीमने कॅनल जवळ बस्थान मांडून दोन कैमरा व ट्रैप लावले. मात्र उन्ह जास्त असल्याने वाघ बाहेर निघायला तयार नव्हता. अखेर रात्री 12 वाजता वाघाला कॅनॉलमधून हुसकावून लावण्यात वन विभागाला यश आले. वाघ पांगली जंगलात पळून गेला, तरीही गावात दहशतीचे वातावरण पसरले आहे.