भंडारा - आजपर्यंत सर्वात जास्त वेळा भाजपचे उमेदवार या विधानसभा मतदारसंघातून निवडून आले आहेत. 2014 मध्ये भाजपातर्फे रामचंद्र अवसरे हे विजयी झाले होते. भाजपसाठी ही जागा महत्वाची माणल्या जाते. विद्यमान आमदारांची मागील 5 वर्षातील कामगिरी समाधान कारक नसल्याने यावर्षी त्यांचे तिकीट कापले जाण्याची शक्यता आहे. तर, या वेळी काँग्रेसचे जिल्हाध्यक्ष निवडणूक लढवण्यासाठी इच्छुक आहेत. त्यांनीही मागील 5 वर्षांत जिल्ह्यात काँग्रेस वाढवण्यासाठी कोणतेही काम केलेले नाही. तसेच, राष्ट्रवादीच्या पदाधीकाऱ्यांनाही मागील 5 वर्षात विरोधक म्हणून आपली भूमिका ठामपणे मांडता आली नाही. परिणामी, दोन्ही पक्षांचा या क्षेत्रात प्रभाव उरलेला नाही.
भंडारा विधानसभा क्षेत्रात कोण मारणार बाजी?
भंडारा व पवनी तालुका मिळून भंडारा विधानसभा क्षेत्राची निर्मिती करण्यात आली आहे. पंधरा वर्षांसाठी अनुसूचित जातीसाठी राखीव ठेवण्यात आला आहे. हिंदुत्ववादी विचारसरणी असलेल्या भाजप आणि शिवसेनेतील अनुसूचित जातीच्या कार्यकर्त्यांना आपल्याला नेतृत्वाची संधी मिळेल, अशी आशा आहे. असे वाटत असतानाही 2009 मध्ये शिवसेनेने निष्ठावंत कार्यकर्त्यांना डावलून नरेंद्र भोंडेकर यांना आयात करून उमेदवारी दिली. तर, 2014 मध्ये भाजपने रामचंद्र अवसरे यांना आयात करून उमेदवारी दिली होती. दोन्ही पक्षाच्या भूमिकेला कार्यकर्त्यांसह मतदारांनीही सहमती दाखवत 2009 मध्ये नरेंद्र भोंडेकर यांना पंचावन्न हजार मतांनी त्यात तर 2014 मध्ये रामचंद्र अवसरे यांना 36 हजार मतांनी निवडून दिले. या निवडणुकीत तरी भाजप निष्ठावंत कार्यकर्त्यांना नेतृत्व करण्याची संधी देते की आयुष्यभर केवळ झेंडे पकडण्यासाठी त्यांचा उपयोग केला जातो, याकडे सर्वांचे लक्ष लागले आहे.
आघाडी आणि युती न झाल्याने 2014 मध्ये सर्वच पक्षाचे उमेदवार मैदानात होते. या निवडणुकीत भाजपचे रामचंद्रराव सर यांना 83 हजार 408 मते मिळाली होती. तर बहुजन समाज पक्षाचे उमेदवार देवांगणा गाढवे यांना 42 हजार 576 मते मिळाली होती. अवसरे हे 38 हजार 832 मतांनी निवडून आले होते. विद्यमान आमदार शिवसेनेचे नरेंद्र भोंडेकर तेव्हा तिसऱ्या स्थानी राहीले होते. त्यांना 42 हजार 766 मते मिळाली होती. काँग्रेसच्या उमेदवाराला 30 हजार तर राष्ट्रवादीच्या उमेदवाराची अमानत जप्त झाली होती. युती झाल्यास 2009 प्रमाणेच ही जागा आपल्याला मिळावी, अशी शिवसेनेची मागणी आहे. मात्र, विद्यमान आमदार भाजपचाच असल्याने आम्ही ही जागा सोडणार नाही, अशी भुमिका भाजपने घेतली आहे. जर असे झालेच तर नरेंद्र भोंडेकर हे ईतर पक्षातून किंवा अपक्ष निवडणूक लढवण्याच्या तयारीत आहेत.
भंडारा पवनी विधानसभा क्षेत्रात एकूण तीन लाख 70 हजार 690 मतदार आहेत. सध्या भाजपसाठी पोषक वातावरण असल्यामुळे भाजपा कार्यकर्त्यांमध्ये मोठा उत्साह पहायला मिळत आहे. तब्बल 23 इच्छुकांनी यासाठी मुलाखती दिल्या आहेत. भाजपने यावेळेस निष्ठावंत कार्यकर्त्यांना संधी दिल्यास जिल्हा परिषद सदस्य अरविंद भालाधरे, रामचंद्र गजभिये, माजी न्यायाधीश महेंद्र गोस्वामी, नगरपालिका उपाध्यक्ष आशु गोंडाने यांच्यापैकी एकाला संधी मिळू शकते. तर रामचंद्र अवसरे, कैलास तांडेकर, नरेंद्र पहाडे हे ही रेसमध्ये आहेत. काँग्रेसमधून जिल्हाध्यक्ष प्रेमसागर गणवीर, जिल्हा परिषद अध्यक्ष रमेश डोंगरे, राजकुमार राऊत यांच्या नावाची चर्चा आहे. तर, राष्ट्रवादी मधून महेंद्र गडकरी, चेतक डोंगरे, नितीन तुमाने हे इच्छुक आहेत.
