ट्रॅक्टर पलटी होऊन मजुराचा मृत्यू, एक मजूर गंभीर जखमी

विजेचे खांब वाहुन नेणाऱ्या ट्रॅक्टरचा अपघात झाल्याने एक मजूर जागीच ठार झाला. तर एक मजूर जखमी झाला. जखमीवर भंडारा जिल्हा रुग्णालयात उपचारासाठी दाखल करण्यात आले आहे.

भंडारा- विजेच्या खांबांची वाहतूक करणारा ट्रॅक्टर पलटी झाल्याने मजुराचा जागीच मृत्यू झाला. तर एक मजूर गंभीर जखमी झाला आहे. ही घटना तुमसर तालुक्यातील खरबी येथे घडली. विजय बडवाईक असे मृत मजुराचे नाव आहे.

खरबीकडून देव्हाडाकडे ट्रॅक्टरने ( क्रमांक एमएच 40, एल-2271 ) विजेचे सिमेंट खांब नेण्यात येत होते. यावेळी चालकाचे नियंत्रण सुटल्याने ट्रॅक्टर रस्त्याच्या बाजुला उलटला. त्यामुळे ट्रॅक्टरमध्ये बसलेले मजूर ट्रॅक्टरखाली दबले गेले. यातील विजय वडवाईक यांचा घटनास्थळीच मृत्यू झाला. तर आणखी एक मजूर गंभीर जखमी झाला आहे. घटनेची माहिती मिळताच गावकऱ्यांनी घटनास्थळावर धाव घेतली. गंभीर असलेल्या मजुराला भंडारा जिल्हा रुग्णालयात उपचारासाठी हलवण्यात आले आहे.