भंडारा -जिल्ह्यातील काही तालुक्यात ३१ डिसेंबरच्या संध्याकाळी पावसाने अचानक हजेरी लावली. यामुळे चाकरमान्यांची चांगलीच तारांबळ उडाली तर, वेगवेगळ्या ठिकाणी नववर्ष साजरा करण्यासाठी केलेल्या तयारीवर पावसाने पाणी फेरले. यामुळे वातावरणात गारव्याचे प्रमाण वाढले सोबतच आनंद साजरा करणाऱ्यांच्या उत्साहावर विरजण पडले.
भंडाऱ्यात पावसाची हजेरी
मंगळवार सकाळपासूनच ढगाळ वातावरण आणि वारे वाहत असल्यामुळे थंडीचा गारठा होता. हवामान खात्याने दिलेल्या अंदाजानुसार मंगळवारी सायंकाळी पावसाने हजेरी लावली आणि जवळपास १ ते दीड तास रिमझिम पाऊस सुरू होता. मात्र, अचानक आलेल्या पावसामुळे घराबाहेर असलेल्या लोकांची चांगलीच फजिती झाली. विशेष म्हणजे, ऑफिस सुटल्याने लगबगीने परत जाण्यासाठी निघालेल्या चाकरमान्यांना ऑफिसबाहेर पाऊस जाण्याची वाट पाहत तात्कळत वाट पाहावी लागली.