भंडारा- जिल्ह्यात शुक्रवारी रात्री झालेल्या पावसामुळे जिल्ह्यातील तीन तालुक्‍यांमध्ये अतिवृष्टी झाली आहे. यामध्ये पवनी तालुक्यात सर्वाधिक 269 मिलिमीटर पावसाची नोंद झाली आहे. तर साकोलीत 80.4 आणि लाखांदूरमध्ये 91.4 मिलिमीटर पावसाची नोंद झाली आहे. या पावसामुळे गोसे धरणाचे 33 ही दरवाजे उघडण्यात आले आहेत. यापैकी 22 दरवाजे हे अर्धा मीटर तर अकरा दरवाजे हे एक मीटरने सुरू केले आहेत. यामधून 4613 क्युसेक पाण्याचा विसर्ग होत आहे.
शुक्रवारी दिवसभर पावसाची उघडझाप सुरू होती. मात्र, रात्री बारानंतर पावसाने पवनी तालुक्यात तांडव केला. रात्रभर मुसळधार पाऊस पडल्याने तब्बल 269 मिलिमीटर पावसाची नोंद झाली. या पावसामुळे सर्वत्र हाहाकार माजलेला आहे. शेतात सर्वत्र पाणीचं पाणी दिसत आहे. या पावसाच्या पाण्यामुळे नागपूर रोड बंद पडलेला आहे. मरु नदीला आलेल्या पुरामुळे हा मार्ग बंद झाला आहे.
पवनी तालुक्यातील जवळपास 25 ते 30 गावाशी संपर्क तुटला आहे. पवनी तालुक्यातील पहाडी वर भूस्खलन होत आहे. तर एका पोल्ट्री फार्ममध्ये सात ते आठ फूट पाणी शिरल्याने जवळपास 100 ते 150 कोंबड्यांचा मृत्यू झाला आहे. आसगाव येथील चाळीस घरांमध्ये पाणी शिरले आहे. वलनी गावात 5 घरात पाणी शिरले आहे. तर कोंढा गावातही घरात पाणी शिरल्याने लोकांचे नुकसान होत आहे. पवनी तालुक्यातील अमन नगर पाण्याखाली आलेला आहे. बामणी सावरला या गावांमध्येही पाणी शिरलेला आहे. बोरगाव जवळील नाल्यावर पूर आल्याने पवनी ते लाखांदूर मार्गही बंद करण्यात आलेला आहे. मुसळधार पावसामुळे धरणातील पाण्यात वाढ झाल्यामुळे धरणाचे 33 दार उघडण्यात आले आहेत. मागील एका आठवळ्यात तब्बल 3 वेळा पवनी तालुक्यात अतिवृष्टी झाली आहे.