भंडारा - विदर्भ विकास पाटबंधारे महामंडळाचे कार्यकारी संचालकांनी पदाचा दुरुपयोग केला. तसेच कुटुंबातील लोकांना फायदा पोहोचविला असल्याचा आरोप युवक राष्ट्रवादी काँग्रेसचे जिल्हाध्यक्ष यशवंत सोनकुसरे यांनी केला आहे. पुनर्वसनाच्या कार्यात तयार नाली (प्रिकास्ट ड्रेन) बनविण्याचे कोट्यावधीचे काम अतुल सुर्वे या कुटुंबातील व्यक्तींना देण्यात आले. तसेच अविनाश सुर्वे हे सेवानिवृत्त होऊनही त्यांना एक वर्ष वाढीव कार्यकाळ का दिला असा प्रश्न त्यांनी यावेळी उपस्थित केला.
काँक्रीट नाल्याच्या बांधकामात कोट्यावधीचा घोटाळा गोसे प्रकल्पबाधित 14 गावांचे पुनर्वसनाचे काम सध्या सुरू आहे. या गावांमध्ये कारखान्यात तयार केलेल्या सिमेंट काँक्रीटच्या रेडिमेट नाल्या बसविण्याचे काम सुरू आहे. हे काम राईट नामक कंपनीला दिण्यात आले. या कंपनीच्या माध्यमातून आतापर्यंत 10 हजार रेडिमेट तयार नाल्या पुनर्वसनाच्या गावात बसविले गेले असून अजून जवळपास एक ते दोन हजार नाल्या बसविण्याचे काम बाकी आहे. राईट ही कंपनी विदर्भ विकास पाटबंधारे महामंडळचे कार्यकारी संचालक अविनाश सुर्वे यांचे नातेवाईक अतुल सुर्वे यांची असल्याचा दावा युवा राष्ट्रवादी काँग्रेसचे जिल्हाध्यक्ष यशवंत सोनकुसरे यांनी केला आहे. त्यांच्या मते मुजबी ग्रामपंचायतला अतुल सुर्वे यांनी राईट या कंपनीच्या लेटरपॅडवर ना हरकत प्रमाणपत्र मिळण्यासाठी अर्ज केला होता. म्हणजेच ही कंपनी त्यांचीच आहे असे दिसून येत आहे. तसेच कार्यकारी संचालक अविनाश सुर्वे यांचा कालावधी संपला असूनही त्यांना एक वर्षासाठी सेवाकाळ वाढवून दिला गेला आहे.
या दोन्ही गोष्टींमुळे इथे मोठ्या प्रमाणात भ्रष्टाचार झाला असून त्याची चौकशी करण्याची मागणी यशवंत सोनकुसरे यांनी केली आहे. या नाल्या ज्या पद्धतीने बसविले गेल्या आहेत त्यामुळे पाणी जमा होते. त्यामुळे पाणी वाहून जाण्यास मोठ्या अडचणी येत आहे. याविषयी कंपनीमध्ये कार्यरत अधिकाऱ्याला विचारले असता ही कंपनी दीपक करगळ यांची असून सुर्वे नावाच्या कोणत्याही व्यक्तीचा या कंपनीशी संबंध नसल्याचे त्यांनी सांगितले. या दोघांपैकी नेमका कोण खरे बोलतो आहे हे आता चौकशीअंती समोर येईल.
