भंडारा-गोंदिया भाजप मुक्त; लोकसभेत दोन लाखांचे मताधिक्य तर विधानसभेत दारुण पराभव

आलेला निकाल हा आमच्यासाठीही धक्कादायकच आहे. पराभवाची नेमकी कारणे कोणती? याची पक्षांतर्गत चर्चा करून त्यावर तोडगा काढू. लोकसभा आणि विधानसभा या दोन्ही वेगवेगळ्या निवडणुका आहेत. कारण, लोकसभेमध्ये केंद्राची कामे आणि पंतप्रधान नरेंद्र मोदी यांचा प्रभाव होता. तर, विधानसभा निवडणुकीत महाराष्ट्र शासनाने बरेच काम केले असले तरी ते कामे आम्ही लोकांपर्यंत पोहोचविण्यात अपयशी ठरलो आहोत.

भंडारा -गुरुवारी मतमोजणीनंतर भंडारा-गोंदिया जिल्हा भाजप मुक्त झाल्याची चर्चा सर्वत्र सुरू आहे. 2014मध्ये भंडारा-गोंदिया जिल्ह्यात सात पैकी सहा उमेदवार हे भाजपचे निवडून आले होते. मात्र, 2019 च्या निकालानंतर भाजपचा केवळ एक उमेदवार निवडून आला आहे. दरम्यान, पक्षांतर्गत कलह, दिलेले उमेदवार, शासनाने केलेले काम लोकांपर्यंत पोहोचविण्यात आलेले अपयश या सर्व गोष्टींमुळे एवढ्या मोठ्या प्रमाणावर पराभवाचे तोंड पाहावे लागल्याचे मत खासदार सुनील मेंढे यांनी मांडले आहे.

नुकत्याच झालेल्या लोकसभा निवडणुकीत भंडारा-गोंदिया जिल्ह्यातील भाजपचे सुनील मेंढे यांनी तब्बल दोन लाख मतांनी विजय मिळविला होता. मात्र सहाच महिन्यात भाजपला याच दोन्ही जिल्ह्यांमध्ये पराभव पाहायला मिळाला आहे. याचे कारण विचारले असता, खासदार मुंडे म्हणाले, "आलेला निकाल हा आमच्यासाठीही धक्कादायकच आहे. पराभवाची नेमकी कारणे कोणती? याची पक्षांतर्गत चर्चा करून त्यावर तोडगा काढू. लोकसभा आणि विधानसभा या दोन्ही वेगवेगळ्या निवडणुका आहेत. कारण, लोकसभेमध्ये केंद्राची कामे आणि पंतप्रधान नरेंद्र मोदी यांचा प्रभाव होता. तर, विधानसभा निवडणुकीत महाराष्ट्र शासनाने बरेच काम केले असले तरी ते कामे आम्ही लोकांपर्यंत पोहोचविण्यात अपयशी ठरलो आहोत. तसेच पक्षांनी दिलेले काही उमेदवार आणि पक्षांतर्गत असलेला कलह यामुळेसुद्धा आमचा पराभव झालेला आहे. या दोन्ही जिल्ह्याचा खासदार असल्यामुळे या सर्व गोष्टींची जबाबदारी मी घेतो आणि मतदारांनी दिलेला हा कौल आम्ही स्वीकारतो" येणाऱ्या काळात पराभवाची सर्व कारणे शोधून अधिक जोमाने चांगले काम करू,असेही त्यांनी सांगितले.

हेही वाचा -पटोले-फुके कार्यकर्त्यांमध्ये हाणामारी; एक गंभीर जखमी

2019 विधानसभा निवडणूक सुरू होण्याअगोदरच भाजपमध्ये मोठ्या प्रमाणात अंतर्गत कलह सुरू झाला, हा कलह थांबण्यापेक्षा वाढतच गेला त्यातच एका विद्यमान आमदाराला विनयभंगाच्या प्रकरणात जेलमध्ये जावं लागलं. पालकमंत्री म्हणून परिणय फुके हे सगळं कलह थांबवण्यात कुठेतरी अपयशी ठरले. त्यानंतर विद्यमान आमदाराचे तिकीट कापल्याने त्यांनी बंडखोरी करत अपक्ष उभे राहिले आणि त्याचा फायदा राष्ट्रवादी काँग्रेसला मिळत त्यांचे उमेदवार निवडून आले. तर, गोंदियामध्ये उमेदवारीचे प्रबळ दावेदार असलेले कार्यकर्त्याचे नाव कापून काँग्रेसच्या आयारामाला भाजपने तिकीटे देऊ केली. याचा विरोध करत भाजप कार्यकर्ते आणि गोंदियाच्या मतदारांनी भाजपच्या बंडखोर उमेदवाराला तब्बल 27 हजार 169 मतांनी निवडून दिले.

हेही वाचा -भाजपमधील अंतर्गत कलह चव्हाट्यावर; 'म्हाडा'च्या सभापतींचा राजीनामा

तर, भंडाऱ्यातील विधानसभा क्षेत्रांमध्ये एका विशिष्ट जातीचा विरोध होत असल्याने 2009 आणि 2014 मध्ये त्या जातीच्या व्यक्तीलाच भाजपतर्फे तिकीट देण्यात आले नाही. त्यामुळे नाराजीचा सूर उमटला आणि त्याचा फटकाही भाजपला बसला. सर्वात आकर्षणाची लढाई ठरलेल्या साकोली विधानसभा क्षेत्रात भाजपने विद्यमान आमदारांचे तिकीट कापून परिणय फुके यांना तिकीट देऊ केले. मात्र नाना पटोले यांच्या गडाला जिंकणे भाजपला शक्य झाले नाही.

भाजपमधील अंतर्गत कलह त्यांच्या पराभवासाठी कारणीभूत आहे, असे म्हणता येईल. येणाऱ्या काळात या दोन्ही जिल्ह्यातील भाजप कार्यकर्ते आणि पदाधिकारी यांच्यातील कलह शमविण्यात कोणत्या नेत्याला यश मिळते, याकडे सर्वांचे लक्ष लागले आहे.