बीड - गोपीनाथ मुंडेंनी अठरापगड जातीच्या लोकांना बरोबर घेऊन अनेक वर्ष राजकारण केले. तेच काम आता मोठ्या नेटाने पुढे घेऊन जाण्याचे काम विरोधी पक्षात कोण करत आहे, असे बीड जिल्ह्यातल्या सर्वसामान्य माणसाला विचारले तर तुम्हाला कोणीही सांगेल. गोपीनाथ मुंडेच्यानंतर धनंजय मुंडे हे समर्थपणे काम करत आहेत. असे राष्ट्रवादी काँग्रेस पार्टीचे सर्वेसर्वा शरद पवार यांनी म्हटले आहे. ते बीड लोकसभा मतदारसंघात राष्ट्रवादी काँग्रेसचे उमेदवार बजरंग सोनवने यांच्या प्रचारासाठी आष्टी येथील जाहीर सभेत बोलत होते.
बीड जिल्ह्यातील जनता प्रगल्भ आहे. आपल्यासाठी तळमळीने काम कोण करते हे त्यांना चांगलेच कळते. लोकसभेच्या प्रचारात पंकजा मुंडे या आम्हीच गोपीनाथ मुंडे यांचा वारसा व विचार पुढे घेऊन जात असल्याचे वारंवार सांगत आहेत. मात्र, गोपीनाथ मुंडे यांचे विचार व सर्वांना बरोबर घेऊन जाण्याचे कसब धनंजय मुंडे यांच्यात आहे, अशी गुगली पवार यांनी सभेत बोलताना टाकली आहे. बजरंग सोनवणे यांच्या प्रचारासाठी आज आष्टी येथे जाहीर सभा पार पडली. यावेळी मंचावर विधान परिषद विरोधी पक्ष नेते धनंजय मुंडे यांची उपस्थिती होती.