बीड - पंकजा मुंडे यांच्याशिवाय महाराष्ट्रात दुसरी सक्षम महिला मुख्यमंत्री म्हणून कोणी दिसत नसल्याचे वक्तव्य प्रीतम मुंडे यांनी केले. तसेच देशाचे पंतप्रधान नरेंद्र मोदी हे पंकजाताईंसाठी परळी सभा घेत आहेत. याचाच अर्थ भविष्यात राज्याच्या राजकारणाची सूत्रे परळीतून हलवली जाणार असल्याचेही त्या म्हणाल्या. प्रीतम मुंडेंनी मुख्यमंत्रीपदाबाबत सूचक वक्तव्य केल्याने राजकीय वर्तुळात याची जोरदार चर्चा सुरु आहे.
ज्या ज्या वेळी विधानसभेच्या निवडणुका येतात, त्यावेळी हमखास एक चर्चा होते. ती म्हणजे महाराष्ट्राला महिला मुख्यमंत्री मिळणार का? याबाबतच प्रीतम मुंडेंना प्रसारमाध्यमांनी प्रश्न विचारला असता त्या म्हणाल्या की, पंकजा मुंडे यांच्याइतके सक्षम महिला नेतृत्व महाराष्ट्रात नाही. त्यांच्याइतकी सक्षम महिला मुख्यमंत्री म्हणून कोणी दिसत नसल्याचे त्या म्हणाल्या.
हेही वाचा - भारत-पाकिस्तान प्रश्न, अन् चीनची स्वार्थी भूमिका..!