अंतुलेंनीच केला होता काँग्रेस विरोधात प्रचार; बीडमधील 'त्या' आठवणी आजही ताज्या

१९८४ च्या दरम्यान काँग्रेसचे नेते बॅ. ए. आर. अंतुलेंना मुख्यमंत्री पदावरून हटविण्यात आले होते. त्यामुळे काँग्रेस नेतृत्वाशी त्यांचे वाद सुरू होते. नेतृत्वाला शह देण्यासाठी त्यांनी पक्षाच्या विरोधातच बंड केले.

बीड - लोकसभा निवडणूक ही आपल्या देशातील कोणत्या उत्सवापेक्षा कमी नसते. प्रत्येक निवडणुकीची काहीतरी खासीयत असते. १९८४ ची निवडणूक बीडकरांना अजूनही लक्षात आहे. या निवडणुकीत काँग्रेसच्या उमेदवार केशरबाई क्षीरसागर यांना काँग्रेसचेच नेते माजी मुख्यमंत्री ए. आर. अंतुले यांचा विरोध झाला होता. तरीही क्षीरसागर अनेक विरोधकांना नमवून मोठ्या मताधिक्याने निवडून आल्या होत्या.

बीड हे राज्याच्या राजकारणात नेहमीच चर्चेचा विषय राहिले आहे. क्रांतीसिंह नाना पाटील, कॉ. गंगाधर बुरांडे, बापुसाहेब काळदाते यांनी बीडचे नाव राज्य आणि देशपातळीवर नेले. सुंदरराव सोळंके आणि गोपिनाथ मुंडे यांच्या रुपाने बीडने राज्याचे नेतृत्वही केले. त्यांच्याच जोडीला माजी खासदार केशरबाई क्षीरसागर यांचे नावही घेतले जाते.

१९८४ ची निवडणूक केशरबाई क्षीरसागरांनी गाजवली. समोर अनेक दिग्गज उमेदवार उभे असताना आणि पक्षांतर्गत फुटीचे आव्हान असतानाही त्यांनी विजय खेचून आणला होता. ९ तगड्या उमेदवारांचा पराभव करण्यात त्या यशस्वी झाल्या होत्या. त्यावेळच्या ४ लाख ७३ हजार ११६ मतांपैकी केशरबाईंना २ लाख २१ हजार ४२१ मते मिळाली होती.

माजी मुख्यमंत्रीच होते विरोधात

१९८४ च्या दरम्यान काँग्रेसचे नेते बॅ. ए. आर. अंतुलेंना मुख्यमंत्री पदावरून हटविण्यात आले होते. त्यामुळे काँग्रेस नेतृत्वाशी त्यांचे वाद सुरू होते. नेतृत्वाला शह देण्यासाठी त्यांनी पक्षाच्या विरोधातच बंड केले. काँग्रेसच्या उमेदवाराच्या विरोधात त्यांनी उमेदवार उभे केले. बीडमध्ये केशरबाई क्षीरसागर यांच्या विरोधात त्यांनी श्रीधरराव गीते यांना पाठिंबा दिला. त्यामुळे काँग्रेससमोर मोठे आव्हान उभे राहिले. पण, क्षीरसागर गीतेंना हरवून विजयी झाल्या. बीडकरांना ही निवडणूक कायम स्मरणात राहिली आहे.

हे उमेदवार होते रिंगणात -
१९८४ च्या लोकसभा निवडणुकीमध्ये अपक्ष उमेदवार म्हणून गोविंदराव काकडे, भानुदास कांबळे, गंगाधर गीते, सुधाकर पाटील, मझहर अली, रतन सातपुते, नाथा सोनवणे, सौंदळे गुरुजी व श्रीधरराव गीते हे यांचा समावेश होता. भाजपमधून माजी आमदार आदिनाथ नवले निवडणुकीच्या रिंगणात उतरले होते. याच निवडणुकीत बीड जिल्ह्यातील मुस्लीम मतदार केशरबाईंच्या काही प्रमाणात विरोधात गेला होता. तरीदेखील बीड जिल्ह्यावर काँग्रेसचा झेंडा फडकवला होता.