बीड - मागील वर्षभरापासून मंत्री पंकजा मुंडे आणि गेवराई विधानसभा मतदारसंघाचे आमदार लक्ष्मण पवार यांच्यात राजकीय दुरावा वाढत आहे. शनिवारी गेवराई येथे पंकजा मुंडे जाहीर सभेत भाषण करताना पवारांच्या समर्थकांनी मुंडेंचे भाषण मध्येच थांबवले. अगोदर पवार यांना गेवराई विधानसभा मतदारसंघातील उमेदवारीचा शब्द द्या, नंतर पुढे बोला, असा आक्रमक पवित्रा पवारांच्या कार्यकर्त्यांनी घेतला. यामुळे मुंडे यांची भर सभेत गोची झाली.
धुळे-सोलापूर राष्ट्रीय महामार्ग लोकार्पण सोहळ्यानिमित्त शनिवारी गेवराई येथे कार्यक्रमात प्रमुख मार्गदर्शक म्हणून पंकजा मुंडे बोलत होत्या. केंद्रीय मंत्री नितीन गडकरी आणि मुख्यमंत्री देवेंद्र फडणवीस यांच्या हस्ते धुळे-सोलापूर राष्ट्रीय महामार्गाचे लोकार्पण होणार होते. मात्र, अचानक गडकरी आणि देवेंद्र फडणवीस यांचा बीड जिल्हा दौरा रद्द झाला. यानंतर मुंडे यांच्या उपस्थितीत धुळे-सोलापूर राष्ट्रीय महामार्गाचा लोकार्पण सोहळा पार पडला. याप्रसंगी पवार यांच्या कार्यकर्त्यांनी मुंडे यांचे भाषण सुरू असतानाच पवार यांना गेवराई विधानसभा उमेदवारीचा शब्द द्या, नंतर बाकीचे बोला, असा आक्रमक पवित्रा पवार यांच्या कार्यकर्त्याने घेतला. यामुळे मुंडे भडकल्या आणि त्यांनी चक्क कार्यकर्त्यांनाच 'बिंडोक' म्हणत आपल्या नेत्याचे वाटोळे करू नका, असे सुनावले. यासर्व प्रकारामुळे कार्यकर्ते भडकले आणि ते पवार यांच्या नावाने घोषणा देऊ लागले.
काही दिवसांवरच बीड लोकसभा मतदार संघाच्या निवडणुका आहेत. अशा परिस्थितीत गेवराईमध्ये मुंडे आणि पवार यांच्यातील संघर्ष जाहीरपणे पाहायला मिळाला. यापूर्वीही अनेक वेळा पवार-मुंडे यांचे जाहीरपणे खटके उडाले आहेत. आता भाजप आणि शिवसेनेची युती आहे. गेवराई विधानसभा मतदारसंघात पवारांप्रमाणे माजी मंत्री बदामराव पंडित देखील मुंडे यांच्या जवळचे आहेत. त्यामुळे विधानसभेची जागा भाजप की शिवसेना, अशी परिस्थिती असल्याचे चित्र विधानसभा मतदारसंघात निर्माण झाले आहे.