परळी - निसर्गाने साथ दिल्याने यंदा नागापूर (ता.परळी) येथील वाण प्रकल्पात भरपूर पाणीसाठा उपलब्ध आहे. त्यामुळे आसपासच्या अनेक गावांना पिण्याच्या पाण्याची सोय व्हावी यासाठी या प्रकल्पातून वाण नदी पात्रात पाणी सोडण्याची मागणी भाजपाचे ज्येष्ठ नेते फुलचंद कराड यांनी केली आहे. याबाबत बीड जिल्हाधिकारी रवींद्र जगताप यांची भेट घेऊन निवेदन दिले.
यावेळी दिलेल्या निवेदनात म्हटले आहे की, वाण धरणातील पाणीसाठा सध्या भरपूर प्रमाणात उपलब्ध असून ही निसर्गाची किमया आहे. परंतु नागापूर, लिंबोटा, नाथ्रा, बहादुरवाडी, पांगरी, दे.टाकळी, सबदराबाद, तडोळी, वडखेल आणि तळेगाव वरिल शिवारात सध्या पाण्याची मोठी अडचण निर्माण झाली आहे. पिण्याच्या पाण्याची सध्या येथे टंचाई असून नदीपात्र कोरडे पडल्यामुळे विहिरी आटल्या आहेत.