सुट्टीनंतर शाळेची पहिली घंटा वाजली; पहिल्या दिवशी विद्यार्थ्यांचे अनोख्या पद्धतीने स्वागत

शाळेचा पहिला दिवस हा जीवनातला महत्वाचा टप्पा मानला जातो. हा दिवस आनंददायी आणि आठवणीत राहणारा असावा यासाठी औरंगाबादेत विविध शाळांमध्ये अनोखे उपक्रम राबविण्यात आले. अशा उपक्रमांनी विद्यार्थ्यांमध्ये शिक्षणाची गोडी वाढते, असा विश्वास शिक्षकांनी व्यक्त केला.

औरंगाबाद- उन्हाळ्याच्या सुट्ट्यानंतर सोमवारी शाळा सुरू झाल्या आहेत. शाळेचा पहिला दिवस अविस्मरणीय व्हावा यासाठी विविध शाळांनी अनोखे उपक्रम राबवले. औरंगाबादच्या मुकुल मंदिर शाळेत विद्यार्थ्यांनी रेन डांस केला. तर सिंदोनच्या जिल्हापरिषद शाळेने यावेळी विद्यार्थ्यांना घोड्याची सफरही घडवली.

शाळेचा पहिला दिवस हा जीवनातला महत्वाचा टप्पा मानला जातो. हा दिवस आनंददायी आणि आठवणीत राहणारा असावा यासाठी औरंगाबादेत विविध शाळांमध्ये अनोखे उपक्रम राबविण्यात आले. अशा उपक्रमांनी विद्यार्थ्यांमध्ये शिक्षणाची गोडी वाढते, असा विश्वास शिक्षकांनी व्यक्त केला.

शाळा सुरू झाली की लहान मुलांना शाळेत जायला अवघड वाटते. विशेषतः पहिल्यांदा शाळेत जाणारी मुलं ही भीत असतात. ही भीती दूर व्हावी या उद्देशाने आता विविध उपक्रम राबवले जात आहेत. औरंगाबादमध्ये आज शाळेच्या पहिल्या दिवशी विद्यार्थ्यांचे अनोख्या पद्धतीने स्वागत करण्यात आले. विद्यार्थ्यांना शाळेची भिती वाटू नये, शाळा ही घरासारखी वाटावी म्हणून शहरातील सिडकोमध्ये असलेल्या मुकूल विद्यालयात चक्क रेन डान्सचे आयोजन करण्यात आले. या रेन डान्समध्ये सांग सांग भोलानाथ म्हणत शाळेच्या पहिल्याच दिवशी विद्यार्थ्यांनी धम्माल केली. तर सिंदोनच्या जिल्हापरिषद शाळेत मुलांना घोडेस्वारीचा आनंद शाळेने दिला.