औरंगाबाद - राज्यात धार्मिक स्थळ आजपासून सुरू करण्यात आली. यावेळी भाजपाकडून जल्लोष साजरा करत असताना या सरकारला शनी मागे लागून सरकार पडेल, असे विधान खासदार डॉ. भागवत कराड यांनी केले. तर दुसरीकडे दारू दुकान सर्रास खुली असताना मंदिरात जाण्यासाठी नियम का? असा प्रश्न आमदार अतुल सावे यांनी उपस्थित केला.
राज्यातील धार्मिक स्थळ आजपासून सुरू करण्यात आल्याने भाजपाने राज्यभर मंदिर परिसरात जल्लोष केला. औरंगाबादच्या सुपारी मारोती मंदिर परिसरात भाजपा नेत्यांनी आणि कार्यकर्त्यांनी आरती करून जल्लोष केला. कार्यकर्त्यांनी एकमेकांना पेठे भरवत जयघोष केला. औरंगाबादच्या जल्लोषात खासदार डॉ. भागवत कराड, आमदार अतुल सावे, शहराध्यक्ष संजय केणेकर, अमृता पालोदकर, माधुरी आदवंत यांच्यासह कार्यकर्त्यांनी सहभाग घेतला.
महाविकास आघाडी सरकारला लागणार शनीची महादशा....
भाजपातर्फे औरंगाबादच्या सुपारी मारोती मंदिरात जल्लोष साजरा करत असताना मंदिर उघडण्यास भाजपाने उशीर केला. लॉकडाऊननंतर दोन महिन्यांमध्ये सर्वच व्यवहार सुरू झाले. मात्र मंदिर बंद ठेवण्यात आली. त्यामुळे भक्तांना आपल्या देवाचं दर्शन घेता आल नाही. मंदिरावर अवलंबून असलेल्या व्यवसायिकांवर उपासमारीची वेळ आली. अनेकवेळा मागणी करूनही हिंदुत्ववादी असल्याचा दावा करणाऱ्या शिवसेनेने मंदिर उघडली नाहीत. मुळात काँग्रेस आणि राष्ट्रवादी सोबत राहून त्यांनी देवाला बंदिस्त ठेवलं, त्यामुळे त्यांच्या मागे नक्कीच शनीची महादशा लागेल, साडेसातीमुळे सरकार जाईल, अशी भावना खासदार डॉ. भागवत कराड यांनी व्यक्त केली.
दारू दुकानात सर्रास प्रवेश, मग मंदिराला बुकिंग कशासाठी -
धार्मिक स्थळ सुरू करत असताना सरकारने अनेक नियम लावले आहेत. त्यामध्ये मोठ्या धार्मिक स्थळांवर ऑनलाइन बुकिंग अनिवार्य केली आहे. इतकेच नाही तर मोजक्याच भक्तांना मंदिर प्रवेश दिला आहे. सरकारच्या या नियमावळीवर भाजपाने आक्षेप घेतला आहे. दारूची दुकान सर्रास सुरू आहेत. त्यांना कुठलेही निर्बंध नाहीत, असे असताना मंदिरामध्ये जाताना नियम का घातले? असा प्रश्न आमदार अतुल सावे यांनी उपस्थित केला. भाविक सर्व नियमांचे पालन करतील मात्र सरकारने जिथे नियम लावायला हवे तिथं लावले नाहीत, धार्मिक स्थळ उघडण्यास उशीर केला त्यात, आवश्यक नियम लावले त्यामुळे भाविक नाराज झालेत, असा आरोप देखील सावे यांनी सरकारवर लावला.