अमरावती :शाळेच्या भल्यामोठ्या परिसरात भाजीपाल्यासह फळांची लागवड करून चिमुकल्यांनी शाळेचा परिसर हिरवागार केला. विशेष म्हणजे पाण्याच्या भीषण टंचाईवर मात करीत या चिमुकल्यांनी पाण्याचा एक थेंबही वाया न जाऊ देता मध्यान भोजनानंतर ताट, हात झाडांमध्ये धुण्याचा नियम अवलंबला आहे. चिमुकल्या विद्यार्थ्यांच्या प्रयत्नाने शाळेच्या आवारात भाज्या आणि फळझाडांसह विविध फुलांची झाडं बहरली आहे. ही सुंदर अशी जिल्हा परिषदे उच्च प्राथमिक शाळा मेळघाटातील जैतादेही या छोट्याशा गावात आहे. विशेष म्हणजे शाळेच्या आवारात घेतलेल्या भाजीपाल्याची विक्री शाळेतील चिमुकले दर शनिवारी गावात बाजार भरून करतात.
1.25 एकर जागेत वृक्ष लागवड :चिखलदरा तालुक्यातील जैतादेही हे गाव सापन धरणात गेल्यामुळे या गावाचे पुनर्वसन 2005 मध्ये मूळ गावापासून 15 किलोमीटर अंतरावर करण्यात आले आहे. जैतादेही येथे 1969 पासून असणाऱ्या जिल्हा परिषदेच्या पूर्व माध्यमिक शाळेचे देखील 2005 मध्ये या परिसरात गावासोबत स्थलांतर झाले. जैतादेही, लगतच्या मेमना या गावातील विद्यार्थी या शाळेत शिकायला येतात. 2018 मध्ये या शाळेचे मुख्याध्यापक गणेश जामुनकर, शिक्षक जितेंद्र राठी यांच्या संकल्पनेतून शाळेच्या परिसरात विविध रोपांची लागवड करण्याची कल्पना समोर आली. यानंतर ग्रामस्थांशी जवळीक साधण्याचा प्रयत्न या दोन्ही शिक्षकांनी केला . 1.25 एकरचा परिसर या शाळेत उपलब्ध असल्यामुळे या ठिकाणी वृक्ष लागवड करण्याची कल्पना लगेच वास्तवात आली.
120 प्रजातींच्या 800 रोपांची लागवड :शाळेच्या आवारात शेवगा, आंबा, सिताफळ, जांभूळ, चिकू, अंजीर, डाळिंब, भोकर, गोड बदाम, बेल, कवट, आवळा, हिरडा, बेहडा, शिकेकाई, रिठा, ताम्हण चिंच, अडुळसा, मोह, चारोळी, टेंभुर्णी, वड, पिंपळ, उंबर, पिंपरी, बांबू , गुगुल, कापूर, सोनचाफा, शेंद्री, खंडू चक्का, पुत्रंजीवा, बकुळ, शिसम, मालकांगणी, चाफा, कांचन सीता, अशोक, चक्री, आवळा, फणस, करवंद, केळी, महोगनी, पॅशनफ्रुट, चित्रक, समुद्रशेष आदी अशा एकूण 120 प्रजातींची एकूण आठशे रोप विद्यार्थ्यांच्या माध्यमातून लावण्यात आली.
विद्यार्थी राखतात झाडांची निगा :आपली शाळा हिरवीगार व्हावी यासाठी शाळेच्या मुख्याध्यापक आणि शिक्षकांनी विद्यार्थ्यांना मार्गदर्शन केल्यावर आता या शाळेत शिकणारे इयत्ता पहिली ते सातवी पर्यंतचे सर्व 95 विद्यार्थी शाळेच्या आवारात लावलेल्या झाडांची नियमित निगा राखत आहेत. रोपांना पाणी देणे, ज्या झाडांची पानांची कापणी करायची आहे, त्या झाडांच्या पानांची कापणी करणे, रोपांना व्यवस्थित पाणी जावे म्हणून मातीचे आळे करणे हे संपूर्ण काम चिमुकले विद्यार्थीच मोठ्या आवडीने या शाळेत करताना दिसतात. बाग कामासाठी आवश्यक असणाऱ्या सर्वच वस्तू शाळेचे मुख्याध्यापक, शिक्षकांनी स्वखर्चाने शाळेत विद्यार्थ्यांना उपलब्ध करून दिले आहेत.
वर्ग खोल्यांमध्येही बहरली हिरवळ :जैतादेही येथील जिल्हा परिषदेच्या पूर्व माध्यमिक शाळेच्या वर्ग खोल्यांमध्ये देखील हिरवळ बहरलेली पाहायला मिळते. प्रत्येक वर्ग खोलीच्या दारासमोर कुंड्यांमध्ये झाडे लावलेली दिसतात तसेच वऱ्हंड्यात देखील हिरवी झाडे आणि वेली बहरलेली दिसतात.