अमरावती- धारणी तालुक्यातील गोलाई गावातील महादेव मंदिर हे मेळघाटातील भाविकांचे श्रद्धास्थान आहे. येथील उंच कड्यांवरून कोसळणार धबधबा आणि धबधब्यांच्या मागे कपारीत महादेव मंदिर आहे. आज श्रावण सोमवार निमित्ताने महादेवाचे दर्शन घेण्यासाठी भाविकांची मोठ्या प्रमाणात गर्दी होत आहे.
कपारीतील महादेवाच्या दर्शनासाठी भाविकांची गर्दी
गोलाई या गावात महादेवाचे एक छोटेसे हेमाडपंथी मंदिर आहे. हे मंदिर प्राचीन काळापासून असून मंदिरापासून वाहणारी नदी ही महादेवाची नदी म्हणून ओळखली जाते. ही नदी मंदिराच्या मागच्या बाजूल्या असलेल्या डोंगर कड्यावरून खाली कोसळते. या परिसरात दिवता मातेची मुर्ती आहे. दिवता माता म्हणजे पार्वती माता असल्याचे परिसरातील रहिवाशांचे म्हणणे आहे. महादेवाच्या पिंडीवर बाराही महिने पाणी पडते. वरच्या बाजूला असणाऱ्या मंदिरालागत पूर्वी राणीचा महल होता. राणीला थेट महादेवाच्या कपारीतून चिखलदरा आणि नरनाळा किल्ल्यावर पोहोचता येईल, असे दोन भुयारी मार्ग या कपारीत आहेत. दोन्ही भुयारी मार्गात पायऱ्या आहेत. आता सुरक्षेच्यादृष्टीने मोठे दगड लावून हे भुयारी मार्ग बंद करण्यात आले असल्याचे येथील रहिवासी सांगतात.