अमरावती - संयुक्त महाराष्ट्राच्या गोष्टी करता आणि विदर्भाला सावत्रपणाची वागणूक का देता? असा सवाल अपक्ष म यांनी मुख्यमंत्री उद्धव ठाकरे यांना केला आहे. मुख्यमंत्री उद्धव ठाकरे हे सध्या नुकसानग्रस्त भागाच्या दौऱ्यावर आहे. मागील सहा महिन्यांपासून मुख्यमंत्री उद्धव ठाकरे हे मातोश्री मध्येच बसून होते परंतु काल त्यांनी नुकसानीचा दौरा केला. केवळ दोन तासांमध्ये दौरा उरकून परत गेले. मातोश्री तुपाशी आणि शेतकरी उपाशी अशी परिस्थिती मुख्यमंत्र्यांनी शेतकऱ्यांची केली आहे, अशी टीका देखील राणा यांनी केली.
मुख्यमंत्री उद्धव ठाकरे यांनी काल सोलापूर जिल्ह्यातील नुकसानग्रस्त शेतजमिनीची पाहणी केली. दरम्यान त्यांच्या दौऱ्यावर विरोधी पक्षनेत्यांनीही टीका केली. दरम्यान, युवा स्वाभिमानचे आमदार रवी राणा यांनी मुख्यमंत्र्यांवर टीका केली. "फक्त एक दिवसाचा दौरा करून भागणार नाही तर किमान पंधरा दिवस महाराष्ट्रभर फिरून शेतकऱ्याची व्यथा जाणून घ्या. नुकसान हे फक्त पश्चिम महाराष्ट्रात किंवा मराठवाडामध्ये झाले नाही. तर विदर्भातील गडचिरोली, भंडारा सह आदी जिल्ह्यात सुद्धा मोठ्या प्रमाणात नुकसान झाले आहे.
अनेकांची शेती वाहून गेलेली आहे. घरांची पडझड झालेली आहे. त्यामुळे एक दिवसाचा दौरा न करता किमान मुख्यमंत्र्यांनी पंधरा दिवस महाराष्ट्राचा दौरा करावा, असे आमदार रवी राणा म्हणाले. एकीकडे संयुक्त महाराष्ट्राची भूमिका घेणारे मुख्यमंत्री विदर्भाला सावत्रपणाची वागणूक देतात, हे चुकीच आहे. असे रवी राणा म्हणाले. यावर्षी शेतकऱ्यांची दसरा, दिवाळी अंधारातच जाणार नाही, याची काळजी मुख्यमंत्र्यांनी घ्यावी असा सल्लाही आमदार रवी राणा यांनी दिला आहे.
