अमरावती- तिवसा तालुक्यातील वणी गाव परिसरात आज दुपारी 1 वाजताच्या सुमारास भीषण आग लागल्याची घटना घडली आहे. या आगीत गावाशेजारी दोन संत्रा बागा जळून खाक झाल्या आहेत. आग एवढी भीषण होती क्षणातच जंगलानजीकचा परिसर आगीच्या कवेत आला आहे. यात दोन संत्रा उत्पादक शेतकऱ्यांचे लाखो रुपयांचे नुकसान झाले आहे.
वणी परिसरात लागलेल्या भीषण आगीची माहिती मिळताच दोन अग्निशामक बंब घटनास्थळी दाखल झाले. सध्या या आगीवर नियंत्रण मिळवण्यासाठी अग्निशामक दलाचे जवान शर्थीचे प्रयत्न करत आहेत. यावेळी आमदार यशोमती ठाकूर यांनीही तत्काळ घटनास्थळी धाव घेतली,तसेच प्रशासनातील अधिकारी सुद्धा घटनास्थळी दाखल झाले आहेत. संत्रा बागेला लागलेली आग पाहूण वणीच्या ग्रामस्थांनी घटनास्थळावर मोठ्या प्रमाणात गर्दी करून आग विझवण्यासाठी प्रयत्न सुरू केले असल्याची माहिती मिळत आहे.