अमरावती :इतवारा बाजारात ‘एमडी’ची विक्री करणाऱ्या डिलिव्हरी मॅनला अटक करण्यात आली आहे. त्याच्याकडून २२.५ ग्रॅम मेफेड्रॉन ‘एमडी’ ड्रग्ज जप्त करण्यात आले आहे. शहर पोलिसांच्या गुन्हे शाखेने शुक्रवारी ही कारवाई केली. मोहम्मद वजीद वल्द अब्दूल नासीर कुरेशी ( वय ४०, रा. गवळीपुरा ) असे अटक करण्यात आलेल्या आरोपीचे नाव आहे.
1 लाख 52 हजाराचा माल जप्त : मोहम्मद वजीद हा शुक्रवारी इतवारा बाजार परिसरातील एका गुळ भंडारजवळ एमडी ड्रग्ज विक्री करीत असल्याची माहिती गस्तीवर असलेल्या गुन्हे शाखेच्या पथकाला मिळाली. त्या आधारावर पथकाने इतवारा बाजार गाठून मोहम्मद वजीदला अटक केली. त्याच्याकडून २२.५ ग्रॅम एमडी ड्रग्ज आणि इतर साहित्य असा एकूण १ लाख ५२ हजार ५०० रुपयांचा मुद्देमाल जप्त करण्यात आला. या प्रकरणी मोहम्मद वजीदविरुद्ध शहर कोतवाली पोलीस ठाण्यात गुन्हा दाखल करण्यात आला आहे. ही कारवाई गुन्हे शाखेचे पोलीस निरीक्षक अर्जून ठोसरे यांच्या नेतृत्वात पोलीस उपनिरीक्षक नरेशकुमार मुंढे, राजूआप्पा बाहेणकर, फिरोज खान, सतीष देशमुख, सुरज चव्हाण, निवृत्ती काकड, सुधीर गुडधे यांनी केली.