अमरावतीत मतिमंद चिमुकली हरवली, 24 तास उलटूनही बेपत्ताच

अमरावतीच्या कॅम्प परिसरात ख्रिस्त कॉलनी येथून, रविवारी दुपारी 3.30 वाजता 7 वर्षांची गतिमंद चिमुकली बेपत्ता झाली. आशादीप गतिमंद शाळेजवळ रविवारी सकाळीच ही मुलगी राहायला आली होती.

अमरावती - शहरातील ख्रिस्त कॉलनी येथे असणाऱ्या आशादीप गतिमंद शाळेजवळ, रविवारी सकाळी राहायला आलेली 7 वर्षांची गतिमंद चिमुकली हरवली आहे. सुप्रिया श्याम काबरा, असे हरवलेल्या चिमुकलीचे नाव आहे.

चांदूरबाजार येथील मुळ रहिवासी असलेल्या प्रीती काबरा आपल्या दोन मतिमंद मुलींना शाळेत सहज जाता यावे, यासाठी त्या रविवारी ख्रिस्त कॉलनी येथे आशादीप गतिमंद शाळेजवळ क्षीरसागर यांच्या घरात राहायला आल्या होत्या. सहा महिन्यांपूर्वी झालेल्या पतीच्या निधनानंतर, प्रीती काबरा आपल्या 7 आणि 4 वर्षांच्या दोन्ही गतिमंद मुलींचा सांभाळ करीत आहेत. गेल्या वर्षी सुप्रियाला अमरावतीच्या आशादीप मतिमंद शाळेत दाखल केले होते. ती चांदूरबाजार येथून स्कूल व्हॅनने अमरावतीला यायची. यावर्षी सुप्रियाला शाळेत जाण्या येण्याचा त्रास होऊ नये, म्हणून प्रीती काबरा यांनी आपले बिराड अमरावतीला आणले होते. धामणगाव रेल्वे येथे राहणाऱ्या आई वडिलांना सोबत घेऊन, चांदूरबाजार येथून त्यांनी आपले सामान अमरावतीत आणले. दुपारपर्यंत घरात सामान रचणे सुरू होते. दुपारी साडेतीन वाजण्याच्या सुमारास सुप्रिया कुठे दिसत नसल्याचे लक्षात येताच प्रिती काबरा घाबरल्या.

अमरावतीत ख्रिस्त कॉलनी परिसरात रविवारी त्यांचा पहिलाच दिवस असल्याने कोणीही ओळखीचे नव्हते. मुलगी बेपत्ता असल्याने घरमालक क्षीरसागर यांच्या मदतीने प्रिती काबरा यांनी ख्रिस्त कॉलनी परिसर मुलीच्या शोधात घेतला. यानंतर गाडगे नगर पोलीस ठाणे गाठून सुप्रिया हरवल्याची तक्रार प्रिती काबरा यांनी नोंदवली. परिसरात नव्यानेच राहायला आलेल्या कुटुंबातील मुलगी पहिल्याच दिवशी बेपत्ता झाल्याचे कळताच परिसरातील युवकांनी रविवारी रात्री 8 वाजेपासून सोमवारी सकाळच्या 5 वाजेपर्यंत तपोवन, वडाळी आदी परिसरापर्यंत चिमुकलीचा शोध घेतला. आता सुप्रियला बेपत्ता होऊन तीस-पस्तीस तासांचा काळ उलटला असताना तिचा कुठलाही तपास लागलेला नाही. चांदूरबाजार येथील प्रसिध्द काबरा हायस्कुलमध्ये प्रिती काबरा यांचा वाटा आहे. याप्रकरणी पोलीस सर्वांगाने तपास करीत आहेत.