अकोला- जिल्ह्यातील राज्य व राष्ट्रीय महामार्गाचे चौपदरीकरनाचे काम सुरू होऊन थांबले आहे. या डांबरी रस्त्याच्या कडेला खोदून ठेवलेल्या खड्ड्यात वाहने फसत आहे. असाच प्रकार निमकरदा गावजवळ घडला. येथे रस्त्याच्या कडेला खोदून ठेवलेल्या खड्ड्यात बस फसली. सुदैवाने या अपघातात कोणीही जखमी झाले नाही.
तेल्हारा डेपोची बस क्रमांक (एम.एच. ४० एन. ८०१२) ही अकोल्याकडे जात होती. ही बस निमकरदा गावाजवळील रस्त्याने जात होती. या रस्त्याच्या कडेला खोदलेल्या जागेत ही बस उतरल्याने ती फसून गेली. त्यामुळे या अपघातात बसमधील प्रवाशांना काय झाले हे कळलेच नाही. बसमधून बाहेर पडण्यासाठी प्रवाशांनी अक्षरशः बसच्या खिडकीतून उड्या मारल्या. सुदैवाने या अपघातात कोणीही जखमी झाले नाही. बसमध्ये फसलेल्या प्रवाशांना बाहेर काढण्यासाठी बसच्या खिडकीचा उपयोग करावा लागला. या अपघातामुळे वाहतूक कोलमडली होती.
