अहमदनगर - नाताळच्या सुट्ट्यांच्या पार्श्वभूमीवर आयोजित करण्यात आलेल्‍या शिर्डी महोत्‍सवाची तयारी पूर्ण झाली आहे. या महोत्सवात ३१ डिसेंबरला विविध सांस्‍कृतिक आणि धार्मिक कार्यक्रमांचे आयोजन करण्यात आले आहे. या काळात भाविकांच्या संख्येत लक्षणीय वाढ होत असून मंदिर प्रशासन भक्तांच्या सेवेसाठी सज्ज असल्याची माहिती संस्‍थानचे मुख्‍य कार्यकारी अधिकारी दीपक मुंगळीकर यांनी दिली आहे.
साईभक्तांच्या व्यवस्थेसाठी मंदिर संस्थान सज्ज
साईभक्‍तांची होणारी संभाव्‍य गर्दी लक्षात घेवून मंदिर परिसरात ५८ हजार चौरस फुटाचे मंडप उभारण्‍यात आले आहेत. तसेच, अतिरिक्‍त निवासव्‍यवस्‍थेसाठी साई धर्मशाळा आणि भक्‍तनिवास स्‍थानही उभारण्‍यात आलेले आहे. साईभक्‍तांना लाडू प्रसाद पाकिटांचा लाभ सुलभतेने मिळावा म्‍हणून गेट क्रमांक ४ जवळ अतिरिक्‍त लाडू विक्री काऊंटर सुरू करण्यात येणार आहेत.