Shirdi Saibaba Trust Donation Problem : भाविकाला दिल्या एकाच नंबरच्या दोन पावत्या, साईभक्तांची फसवणूक

Shirdi Saibaba Trust Donation Problem : साईबाबांच्या दर्शनासाठी देश विदेशातून भाविक शिर्डीत येतात. हे भाविक मोठ्या श्रद्धेनं साईबाबांना दानही करतात. मात्र, आता या दानावरच डल्ला मारला जात असल्याची तक्रार साईबाबा संस्थानला आलीय. त्यामुळं या प्रकरणाची चौकशी संस्थानने सुरू केली आहे. (Deception of devotees)

अहमदनगर Shirdi Saibaba Trust Donation Problem : 'सबका मालिक एक'चा महामंत्र देणाऱ्या शिर्डी साईबाबांचे देश विदेशात करोडो भक्त आहेत. यातील काही भाविक आपल्या श्रद्धेनुसार साईचरणी ऑनलाईन अथवा शिर्डीतील देणगी काऊंटरवर रोख पैसे दान करत असतात. मात्र, आता साईभक्तांनी साई दरबारातील देणगी काऊंटरवर जमा केलेल्या भक्तांच्या श्रध्देवर आणि पैशावर कोणी डल्ला मारतंय का? हा प्रश्न उपस्थित होतोय. त्याचं कारणही तसंच आहे. साई संस्थाननं साईमंदिर परिसरात उभारलेल्या देणगी कार्यालयात भाविक रोख रक्कमेची देणगी देण्यासाठी गेला. त्यानंतर त्या भाविकाला दान करतेवेळी रक्कमेची एकच पावती न देता दोन पावत्या दिल्या जातात. त्यातील एक पावती बनावट असल्याची शक्यता आता साई संस्थानकडे आलेल्या एका निनावी तक्रारीवरून व्यक्त होतेय.

'अशी' घडलीय घटना :एक भाविक साईबाबांच्या दर्शनानंतर मंदिर परिसरातील साई संस्थानच्या देणगी काउंटरवर देणगी देण्यासाठी गेला. त्या भाविकानं आपल्या श्रद्धेनुसार देणगीही दिली. त्या भाविकाला देणगी काउंटरवरील कर्मचाऱ्यानं देणगीची एक पावती न देता थेट दोन एकाच नंबरच्या पावत्या दिल्या. हे भाविकाच्या लक्षात आल्यानं त्या भाविकानं साई संस्थानकडे तक्रार केलीय. भाविकाच्या तक्रारीनंतर साई संस्थानच्या अधिकाऱ्यांनी देणगी कार्यालयातील काही कर्मचाऱ्यांच्या दुसरं कारण दाखवत तातडीनं दुसऱ्या ठिकाणी बदल्याही केल्यात. मात्र त्यांची बदली करून काहीच होणार नाही. या कर्मचाऱ्यांवर कारवाई करण्यात यावी, अशी मागणी शिर्डीतील जागरुक नागरिकांनी केलीय. या कर्मचाऱ्यांवर गुन्हा दाखल करून यांची चौकशी करण्यात आली, तर असा प्रकार किती दिवसांपासून सुरू होता हेही समोर येईल. भाविकानं साई संस्थानकडे या प्रकरणाची तक्रार केलीय. तर साई संस्थान त्या भाविकाचं नाव का जाहीर करत नाही? साई संस्थान आपल्या कर्मचाऱ्यांना पाठीशी घालण्याचा प्रयत्न करताय का? असा सवाल ज्येष्ठ पत्रकार भुजबळ यांनी उपस्थित केलाय.

ऑनलाइन पध्दतीनं फसवणूक :साईभक्तांची ऑनलाइन पध्दतीनं फसवणूक करण्याचे अनेक प्रकार समोर आले आहेत. मात्र, आता साई संस्थानच्या अधिकृत देणगी कार्यालयातून अथवा बाहेरुन भक्तांना देणगीची बनावट पावती देऊन भक्तांच्या श्रध्देच्या पैशावर जर डल्ला मारला जात असेल, तर साईसंस्थान आणि पोलिस याच्या मुळाशी जातील. या रॅकेटचा शोध घेत भक्तांच्या श्रध्देला तडा जावू देवू नये, अशी मागणी शिर्डी ग्रामस्थांकडून होतेय.

बनावट पावती आणि दानात हेराफेरी :या प्रकरणाची चर्चा आता सोशल मीडियावरही होऊ लागलीय. शिर्डीतील काही प्रमुख ग्रामस्थांनी साई संस्थानचे कार्यकारी अधिकारी यांची भेट घेत साई संस्थाननं या प्रकरणात लक्ष घालत सबंधित कर्मचारी दोषी असल्यास कारवाई करण्याची मागणी केलीय. साई संस्थानकडे बनावट पावती आणि दानात हेराफेरी केली असल्याची तक्रार आल्यानं आता साई संस्थाननं चौकशी सुरू केलीय. या प्रकरणी सत्यता आढळल्यास पोलिसात गुन्हा दाखल करणार, असं अश्वासन ग्रामस्थांना साई संस्थानचे मुख्य कार्यकारी अधिकारी पी शिवा शंकर यांनी दिलंय.


हेही वाचा :