अहमदनगर - अवघ्या ३ दिवसांपूर्वीच लग्न झालेल्या नववधूने धूम स्टाईलने आपल्या प्रियकरासोबत धूम ठोकल्याची घटना घडली. देवदर्शनाला पतीसोबत आलेल्या नव्या नवरीने प्रियकरासोबत धूम ठोकल्याची घटना पाथर्डी तालुक्यातील मढी येथे घडली. हा पलायन नाट्याचा प्रकार मात्र, देवस्थानच्या विविध सीसीटीव्ही कॅमेऱ्यात कैद झाला आहे.
पाथर्डी येथे केवळ ३ दिवसांपूर्वी लग्न झालेले नव वधू-वर नाथपंथीय अशा मढी येथील कानिफनाथांच्या संजीवनी समाधी दर्शनासाठी आले होते. नवऱ्याने आपली मोटरसायकल देवस्थानच्या पार्किंगमध्ये पार्क करून ठेवली होती. यावेळी नववधू ठरल्याप्रमाणे प्रियकराच्या संपर्कात होती. प्रियकर नववधूच्या पाळतीवर होता. मंदिर परिसरात तसेच देव दर्शनानंतर पायऱ्या उतरतानाही तो या दोघांच्या मागावर होता.
नवरा आपली मोटारसायकल आणण्यासाठी पार्किंगमध्ये गेला होता. त्यावेळी नववधू पार्किंगच्या गेटवरच उभी होती. हीच संधी साधत नववधूने प्रियकरासोबत मोटारसायकलवरुन बसून धूम ठोकली. ही सर्व घटना सीसीटीव्ही कॅमेरामध्ये कैद झाली आहे. याप्रकरणी नवऱ्याने पाथर्डी पोलिसांत तक्रार दाखल केली आहे.