टोकियो- सर्बियाचा स्टार टेनिसपटू नोव्हाक जोकोव्हिचने आपल्या आक्रमक खेळाच्या जोरावर, टेनिस जगतातील रॉजर फेडरर, राफेल नदाल आणि अँडी मरे यांच्यासारख्या मातब्बर खेळाडूंना धूळ चारली आहे. आता मात्र, नोव्हाक जोकोव्हिच वेगळ्या खेळासंदर्भात चर्चेत आला आहे.
नोव्हानने आज (सोमवार) सकाळी टोकियोत सुमो पैलवानाशीच पंगा घेतला. त्याने रिंगमध्ये उतरत सुमो पैलवानासोबत दोन हात केले आणि सुमो 'ट्रिक्स' शिकून घेतल्या. या लढतीचे तीन व्हिडिओ 'एटीपी टूर'ने आपल्या ट्विटर अकाऊंटवरुन शेअर केले आहेत.
नेमकं काय आहे व्हिडिओत -
एटीपी टूरने शेअर केलेल्या व्हिडिओमध्ये नोव्हान जोकोव्हिच एका अगडबंब सुमो पैलवानाशी पंगा घेताना दिसत आहे. यात तो सुमो पैलवानाला रिंगच्या बाहेर ढकलण्याचा प्रयत्न करत आहे. मात्र, यात तो असफल ठरलेला दिसत आहे.