एंटवर्प ( बेल्जिअम ) - भारतीय पुरुष हॉकी संघाने बेल्जियम टूरमध्ये विजयी घोडदौड कायम राखली आहे. भारतीय संघाने विश्वविजेते आणि युरोपियन विजेते असलेल्या बेल्जियमचा २-१ ने पराभव केला. या दौऱ्यातील भारतीय संघाचा हा सलग चौथा विजय आहे.
बेल्जियम दौऱ्यातील चौथा सामना भारत विरुध्द यजमान बेल्जियम संघामध्ये झाला. यात भारताचा अमित रोहिदास याने पहिल्या हाफच्या १० व्याच मिनिटाला अप्रतिम गोल करत भारताला आघाडी मिळवून दिली. यानंतर यजनाम बेल्जियमकडून कर्णधार फॅलिक्स ३३ व्या मिनिटाला गोल करत सामन्यात बरोबरी साधली. तेव्हा सामन्याच्या दुसऱ्या हाफमध्ये सिमरनजीत सिंग याने ५२ व्या मिनिटाला गोल करत भारताला २-१ ने आघाडीवर नेले. ती आघाडी भारताने कायम ठेवत सामना जिंकला.