साउथम्पटन -जागतिक कसोटी अजिंक्यपद स्पर्धेत समालोचकाची भूमिका निभावत असलेल्या दिनेश कार्तिकने साउथम्पटन येथील हवामानाविषयी अपडेट दिले आहेत. कार्तिकने त्याच्या ट्विटर अकाउंटवरुन मैदानाच्या फोटो शेअर केला आहे. या फोटोत पाऊस होत असल्याचे पाहायला मिळत आहे. हीच स्थिती कायम राहिली तर चौथ्या दिवसाचा खेळ रद्द करण्यात येऊ शकतो.
दिनेशने साउथम्पटन येथील मैदानाचा फोटो शेअर करत 'सॉरी' म्हटलं आहे. पुढे त्याने ही वेळ चांगली वाटत नसल्याचे देखील सांगितलं आहे. दरम्यान, कार्तिकचे ट्विट पाहता चौथ्या दिवसाचा खेळ पावसामुळे रद्द होण्याची दाट शक्यता वर्तवली जात आहे.
भारतीय संघ २१७ धावांत गारद -
भारत आणि न्यूझीलंड यांच्यात जागतिक कसोटी अजिंक्यपद स्पर्धेचा अंतिम सामना साउथम्पटनमध्ये रंगला आहे. न्यूझीलंडने या सामन्यात नाणेफेक जिंकून प्रथम गोलंदाजी करण्याचा निर्णय घेतला. तेव्हा न्यूझीलंडच्या भेदक माऱ्यासमोर भारताचा पहिला डाव २१७ धावांवर आटोपला आहे. तिसऱ्या दिवशी भारताच्या एकाही फलंदाजाला न्यूझीलंडच्या गोलंदाजीचा धैर्याने सामना करता आला नाही. काइल जेमिसनने ५ गडी बाद करत भारताच्या डावाला खिंडार पाडले.