कराची (पाकिस्तान) : पाकिस्तान क्रिकेट संघाचा वेगवान गोलंदाज शाहीन शाह आफ्रिदी विवाहबंधनात अडकला आहे. शाहीन आणि अंशा आफ्रिदीचे शुक्रवारी कराचीमध्ये लग्न झाले. अंशा आफ्रिदी ही पाकिस्तानचा माजी अष्टपैलू खेळाडू आणि कर्णधार शाहिद आफ्रिदीची मुलगी आहे. शाहीनच्या लग्नात पाकिस्तान क्रिकेट संघातील खेळाडूंसह त्याचे जवळचे नातेवाईक उपस्थित होते. शाहीन आणि अंशाच्या लग्नाचे फोटो सोशल मीडियावर खूप ट्रेंड करत आहेत. त्याच्या चाहत्यांसह अनेक दिग्गज त्याच्या फोटोवर कमेंट करून त्याला अभिनंदनाचे संदेश देत आहेत.
मुस्लिम धर्मानुसार निकाह : शाहीन शाह आणि अंशा आफ्रिदीच्या लग्नाची चर्चा बऱ्याच दिवसांपासून सुरू होती. या दोघांचा सुमारे 2 वर्षांपूर्वी साखरपुडा झाला होता. आता दोघेही लग्नाच्या बंधनात अडकले आहेत. 3 फेब्रुवारीला कराचीत त्यांच्या कुटुंबीय आणि मित्रांच्या उपस्थितीत शाहीन-अंशा यांनी लग्न करून या चर्चेला पूर्णविराम दिला आहे. मुस्लिम धर्मानुसार विधी पार पाडत दोघांनीही एकमेकांचा स्वीकार केला. शाहीन आणि अंशाचा मेहंदी सेरेमनी 2 फेब्रुवारीला पार पडला होता.
बाबर आझमने मिठी मारून दिल्या शुभेच्छा : पाकिस्तानचा क्रिकेटर शाहीन आफ्रिदी आपल्या वेगवान गोलंदाजीमुळे नेहमीच चर्चेत असतो. शाहीनने पाकिस्तान संघासाठी अनेक मोठ्या प्रसंगी चमकदार कामगिरी केली आहे. शाहीन-अंशाच्या निकाहचा एक व्हिडिओ सोशल मीडियावर व्हायरल होत आहे, ज्यामध्ये पाकिस्तानी फलंदाज बाबर आझम शाहीनला मिठी मारून लग्नासाठी शुभेच्छा देत असल्याचे दिसत आहे.