मुंबई - जगातील सर्वाधिक विस्फोटक फलंदाजांपैकी एक असलेल्या ख्रिस गेलचे विंडीजच्या संघात पुनरागमन झाले आहे. इंग्लंड विरुद्ध होणाऱ्या पहिल्या २ एकदिवसीय सामन्यांसाठी विंडीजच्या संघाची घोषणा झाली आहे. यात ख्रिस गेलचा समावेश करण्यात आला आहे. त्याचसोबत डाव्या हाताने फलंदाजी करणारा निकोलस पूरन याचीही राष्ट्रीय संघात निवड झाली. दोन्ही संघात पहिला एकदिवसीय सामना २० फेब्रुवारीला होणार आहे.
आक्रमक फलंदाज ख्रिस गेल मागील वर्षीच्या जुलैपासून संघातून बाहेर आहे. अखेर ६ महिन्यानंतर त्याचे संघात पुनरागमन झाले आहे. ३९ वर्षीय गेलला इंग्लंडमध्ये होणारा विश्वचषक डोळ्यासमोर ठेवून त्याची निवड करण्यात आली आहे. गेल विंडीजकडून सर्वाधिक एकदिवसीय सामने खेळणार दूसरा खेळाडू आहे. त्याने आतापर्यंत २८४ एकदिवसीय सामने खेळले असून त्यात त्याने ९ हजार ७२७ धावा केल्या.