मुंबई: इंडियन प्रीमियर लीगच्या पंधराव्या हंगामातील 32 वा सामना बुधवारी दिल्ली कॅपिटल्स विरुद्ध पंजाब किंग्ज ( Delhi Capitals vs Punjab Kings ) संघात मुंबईतील ब्रेबॉर्न स्टेडियमवर खेळला गेला. या सामन्यात दिल्ली कॅपिटल्सने पंजाब किंग्ज संघावर 9 विकेट्सने विजय ( DC beat Punjab by 9 wickets ) मिळवला. पंजाब किंग्ज संघाने प्रथम फलंदाजी करताना सर्वबाद 115 धावा केल्या आणि 116 धावांचे लक्ष दिले होते. त्यामुळे दिल्ली कॅपिटल्सने 10.3 षटकांत 1 बाद 119 धावा करत लक्ष्य पूर्ण केले.
दिल्लीकडून डेव्हिड वॉर्नरने 30 चेंडूत 60 धावा केल्या. पृथ्वी शॉने 20 चेंडूत 41 धावांची शानदार फलंदाजी करत संघाला सहज विजय मिळवून देण्यात यश मिळवले. त्याचबरोबर पृथ्वी शॉने आपल्या टी-20 कारकिर्दीतील 2000 धावांचा टप्पा पार केला. दिल्लीची एकमेव विकेट पृथ्वीच्या रूपाने पडली. पृथ्वी शॉ आणि डेव्हिड वॉर्नरने पहिल्या गड्यासाठी 83 धावांची भक्कम भागीदारी केली.पृथ्वी शॉला फिरकीपटू राहुल चहरने बाद केले.