नवी दिल्ली : महिला दिनी म्हणजेच 8 मार्च रोजी जन्मलेल्या हरमनप्रीत कौरने क्रिकेटमध्ये स्वत:ची एक वेगळी ओळख निर्माण केली आहे. हरमनप्रीत कौर ही टीम इंडियाची अष्टपैलू खेळाडू आहे. तिने आपल्या क्रिकेट कारकिर्दीत आतापर्यंत अनेक सामन्यांमध्ये टीम इंडियाला विजय मिळवून दिला आहे. 2009 मध्ये तिच्या क्रिकेट कारकिर्दीला सुरुवात करणाऱ्या हरमनप्रीतने आतापर्यंतच्या प्रवासात 100 हून अधिक एकदिवसीय आणि टी-20 सामने खेळले आहेत. 4 मार्चपासून सुरू झालेल्या डब्ल्यूपीएल 2023 मध्ये हरमनप्रीत कौरच्या नेतृत्वाखाली मुंबई इंडियन्सने दोन सामने जिंकले आहेत. तिने काही विक्रमही आपल्या नावावर केले असून त्यात तिने माजी कर्णधार विराट कोहलीलाही मागे टाकले आहे.
मुंबई इंडियन्सचा तिसरा सामना : डब्ल्यूपीएल लीगचा 7 वा सामना गुरूवार 9 मार्च रोजी मुंबई इंडियन्स आणि दिल्ली कॅपिटल्स यांच्यात होणार आहे. या लीगमधील मुंबई इंडियन्सचा हा तिसरा सामना असेल. कर्णधार हरमनप्रीत कौरने मुंबई संघाच्या सर्व खेळाडूंसोबत केक कापून आपला वाढदिवस साजरा केला. मुंबई इंडियन्सने त्याचा व्हिडिओ शेअर केला आहे, ज्यामध्ये हरमनप्रीत स्पष्टपणे केक कापत आहे आणि संघातील सर्व खेळाडूंना खाऊ घालत आहे. यासोबतच सर्व खेळाडू व्हिडिओमध्ये डान्स करताना दिसत आहेत. अनेक दिग्गज क्रिकेटपटूंनी तिला वाढदिवसाच्या शुभेच्छा दिल्या आहेत.
वीरेंद्र सेहवागला आदर्श मानते : हरमनप्रीत कौरचा जन्म 8 मार्च 1989 रोजी पंजाबमधील मोगा जिल्ह्यात झाला. तिचे वडील हरमंदर सिंग भुल्लर हे व्हॉलीबॉल आणि बास्केटबॉल खेळाडू होते आणि त्यांच्या आईचे नाव सतविंदर आहे. हरमनप्रीत कौरला लहानपणापासूनच क्रिकेटमध्ये रस होता. हरमनप्रीत भारताचा माजी फलंदाज वीरेंद्र सेहवागला आपला आदर्श मानते. हरमनप्रीत कौरच्या क्रिकेट कारकिर्दीबद्दल बोलायचे झाले तर ती एक उत्कृष्ट अष्टपैलू खेळाडू आहे. हरमनप्रीत कौरला महिला वनडे विश्वचषक 2022 मध्ये टीम इंडियाची उपकर्णधार बनवण्यात आले.
शतक झळकावणारी पहिली भारतीय महिला क्रिकेटपटू : हरमनप्रीत कौरने 2017 एकदिवसीय विश्वचषक स्पर्धेच्या उपांत्य फेरीत 171 धावांची तुफानी नाबाद खेळी खेळली. या खेळीत तिने 115 चेंडूत 20 चौकार आणि 7 षटकार ठोकले. हरमनप्रीत कौरच्या या खेळीच्या जोरावर टीम इंडियाने 42 षटकात 4 गडी गमावून 281 धावा केल्या होत्या. हरमनप्रीतच्या या वेगवान खेळीची नोंद रेकॉर्ड बुकमध्ये झाली आहे. तिची ही धावसंख्या विश्वचषक आणि एकदिवसीय क्रिकेटमधील सर्वोच्च धावसंख्या आहे. क्रिकेटच्या T20 फॉरमॅटमध्ये शतक झळकावणारी हरमनप्रीत कौर ही पहिली भारतीय महिला क्रिकेटपटू आहे. हरमनप्रीतने या बाबतीत स्टार फलंदाज विराट कोहलीलाही मागे टाकले आहे. हरमनप्रीतने T20 विश्वचषक 2018 मध्ये न्यूझीलंडविरुद्ध 103 धावांची शानदार खेळी केली होती. या खेळीत तिने 51 चेंडूत 7 चौकार आणि 8 षटकारही ठोकले.
हेही वाचा :ICC Mens Player of the Month Nominees : आयसीसी मेन्स प्लेअर ऑफ द मंथ नामांकनामध्ये रवींद्र जडेजाचा समावेश
