बाबर आझम ठरला विश्वचषकातील सर्वोत्कृष्ट पाकिस्तानी फलंदाज..'हा' विश्वविक्रम केला नावावर

बाबरने या स्पर्धेत 8 सामन्यात 474 धावा केल्या आहेत.

लंडन -आयसीसी विश्वकरंडक क्रिकेट स्पर्धेत आज स्पर्धेबाहेर पडलेल्या पाकिस्तान आणि बांगलादेश या संघामध्ये सामना सुरु आहे. या सामन्यात पाकिस्तानने प्रथम फलंदाजी करताना 50 षटकात 9 बाद 315 धावा केल्या आहेत. पाकिस्तानकडून इमाम उल हकने शतकी खेळी केली तर फॉर्मात असलेल्या बाबर आझमने 96 धावांची खेळी करत दोन जबरदस्त विक्रम आपल्या नावावर केले आहेत.

बाबरने या स्पर्धेत 8 सामन्यात 474 धावा केल्या आहेत. त्यामुळे पदार्पणाच्या विश्वचषकात सर्वाधिक धावा करण्याचा विश्वविक्रम त्याच्या नावावर झाला आहे. शिवाय २७ वर्षांपूर्वीचा जावेद मियांदादचा विक्रमही त्याने मोडित काढला आहे.

१९९२ च्या विश्वकरंडक क्रिकेट स्पर्धेत जावेद मियांदादने ९ सामन्यात ४३७ धावा केल्या होत्या. बाबरने यंदाच्या विश्वकरंडक स्पर्धेत फक्त ८ सामन्यांत हा विक्रम रचला आहे.