मुंबई - इंग्लंडविरोधातील कसोटी मालिकेला ५ फेब्रुवारीपासून सुरुवात होणार आहे. दोन्ही संघ या मालिकेसाठी चेन्नईत दाखल झाले आहेत. उभय संघात ४ कसोटी, ५ टी-२० आणि ३ एकदिवसीय सामन्यांची मालिका खेळवली जाणार आहे. या दौऱ्याला सुरूवात होण्याआधी भारताचा वेगवान गोलंदाज जसप्रीत बुमराहचा एक व्हिडिओ व्हायरल होत आहे. यात बुमराह भारताचा दिग्गज फिरकीपटू अनिल कुंबळे यांच्या गोलंदाजीची नकल करताना पाहायला मिळत आहे.
बीसीसीआयने त्यांच्या अधिकृत ट्विटर अकाउंटवरुन बुमराहचा व्हिडिओ शेअर केला आहे. यात बुमराह अनिल कुंबळे यांच्या गोलंदाजीची नकल करताना दिसून येत आहे. विशेष म्हणजे, त्याने फेकलेले चेंडू कुंबळे यांच्या फिरकीप्रमाणे झपकन आत वळत आहेत. जसप्रीत बुमराह आपल्या अचूक यॉर्करने भल्याभल्या फलंदाजाची भंबेरी उडवताना अनेकदा पाहायला मिळाला. आता त्याची फिरकी गोलंदाजी पाहून नेटिझन्स त्याच्यावर फिदा झाले आहेत. सद्या हा व्हिडिओ सोशल मीडियावर चांगलाच व्हायरल होत आहे.