चेन्नई - भारतीय संघाचा कर्णधार विराट कोहली पॅटरनिटी सुट्टीनंतर संघासोबत जोडला गेला आहे. विराट काल ( ता. २७) उशिरा रात्री चेन्नईमध्ये दाखल झाला. आता विराट पुढील सहा दिवस क्वारंटाइन राहणार आहे.
विराट कोहली चेन्नईत दाखल
भारत आणि इंग्लंड यांच्यातील ४ सामन्यांच्या कसोटी मालिकेला ५ फेब्रुवारीपासून सुरूवात होणार आहे. उभय संघातील पहिले दोन सामने एम. ए. चिदंबरम स्टेडियममध्ये खेळवले जाणार आहेत.
उभय संघातील या मालिकेसाठी इंग्लंडचा संघ देखील चेन्नईत दाखल झाला आहे. सर्व खेळाडू बायोबबलमध्ये असून यात त्यांना बाहेर फिरण्यापासून मज्जाव करण्यात आला आहे. क्वारंटाइन दरम्यान, त्यांची अनेकदा कोरोना चाचणी करण्यात येणार आहे. हा कालावधी संपल्यानंतर खेळाडूंना सरावास परवानगी मिळेल.