IPL २०२० : 'रैना भलेही सुरूवातीचे काही सामने खेळणार नाही, पण तो सीएसकेमध्ये परत येईल'

भारताचे माजी क्रिकेटपटू दीप दासगुप्ता यांनी, रैना सीएसकेमध्ये पुनरागमन करू शकतो, असे म्हटलं आहे.

मुंबई - सुरेश रैना पाठोपाठ हरभजन सिंगने आयपीएल २०२० स्पर्धेतून माघार घेतल्याने, चेन्नई सुपर किंग्जचा संघ अडचणीत आला आहे. अशात भारतीय संघाच्या माजी क्रिकेटपटूने रैनाबद्दल मत व्यक्त केले आहे. भारताचे माजी क्रिकेटपटू दीप दासगुप्ता यांनी, रैना सीएसकेमध्ये पुनरागमन करू शकतो, असे म्हटलं आहे.

एका क्रीडा संकेतस्थळाशी बोलताना दीपदास गुप्ता म्हणाले की, 'सुरेश रैना सीएसकेमध्ये पुनरागमन करेल, असे मला वाटते. क्वारंटाइनच्या नियमामुळे कदाचित त्याला पहिले काही सामने खेळता येणार नाही. पण तो नंतर संघात पुनरागमन करेल. त्यामुळेच बहुधा सीएसकेने अद्याप रैनाच्या ऐवजी संघात कोणत्याही खेळाडूला जागा दिलेली नाही.'

सुरेश रैना

दरम्यान, सीएसकेने अद्याप सुरेश रैना आणि हरभजन सिंग यांच्या जागेवर बदली खेळाडूंची घोषणा केलेली नाही. यामुळे रैनाच्या परतीची आशा वाढली आहे. जर असे घडल्यास, सीएसकेच्या संघाला अधिक बळकटी मिळणार आहे.

आयपीएल २०२०साठी दीप दासगुप्ता यांची निवड कॉमेंट्री पॅनलमध्ये करण्यात आली आहे. ते १३व्या हंगामात कॉमेंट्री करताना दिसून येतील. त्यांनी ८ कसोटी आणि ५ एकदिवसीय सामन्यांत भारताचे प्रतिनिधीत्व केले आहे. दुसरीकडे सीएसकेच्या खेळाडूंनी सरावाला सुरुवात केली आहे. १९ सप्टेंबर ते १० नोव्हेंबर या कालावधीत आयपीएलचा १३वा हंगाम रंगणार आहे.

हेही वाचा -IPL 2020 : 'या' सात खेळाडूंनी घेतली माघार, त्यांच्या जागेवर कोण खेळणार, जाणून घ्या...