मुंबई - जम्मू-काश्मीरचे माजी मुख्यमंत्री ओमर अब्दुल्ला यांनी त्यांच्या ट्विटर अकाऊंवरुन एक व्हिडिओ शेअर केला आहे. हा व्हिडिओ क्वारंटाईन सेंटरमधील आहे. त्या क्वारंटाईन सेंटरमधील लोकं चक्क क्रिकेट सामना खेळताना दिसत आहेत. यावर ओमर अब्दुल्ला यांनी मजेशीर रिअ‌ॅक्शन दिली आहे.
भारतामध्ये एखाद्या पंथाप्रमाणे रुजलेला क्रिकेट हा खेळ म्हणजे अनेकांचा जीव की प्राण. जिथे जागा मिळेल तिथे क्रिकेट खेळण्यास सुरूवात करणारी मंडळी आपल्याला सर्वत्र पाहायला मिळतील. पण आता तर चक्क क्वारंटाईन सेंटरमध्येच क्रिकेटचा सामना रंगला. ओमर यांनी या सामन्याचा व्हिडिओ पोस्ट केला आहे. त्यांनी या व्हिडिओ, 'जागा मिळाली तर खेळणार, क्वारंटाईन टाईमपास', असे मजेशीर कॅप्शन दिले आहे.
व्हिडिओच्या सुरूवातीला एक तरुण मास्क घालून फलंदाजी करताना पाहायला मिळत आहे. त्यासोबत अनेक तरुणही दिसून येत आहेत. कॅमेरा जसा फिरवला जातो, त्यात क्वारंटाईन सेंटरमधील सर्व दृश्य दिसत आहेत. यात काही लोक बेडवर आराम करताना दिसून येत आहेत. हा व्हिडिओ नेमकं कोणत्या क्वारंटाईन सेंटरचा आहे, याची माहिती मिळू शकली नाही.