मुंबई -बीसीसीआयने दक्षिण आफ्रिकेविरुद्धच्या कसोटी मालिकेसाठी भारतीय संघाची घोषणा केली आहे. या मालिकेसाठी फॉर्मात नसलेल्या केएल राहुलला डच्चू देण्यात आला. त्यामुळे संघाबाहेर ठेवण्यात आलेल्या राहुलला निवड समितीचे अध्यक्ष एम.एस.के.प्रसाद यांनी एक सल्ला दिला आहे.
हेही वाचा -महिला हॉकी : इंग्लंडविरुद्धच्या मालिकेसाठी राणी रामपालकडे टीम इंडियाचे कर्णधारपद
राहुलने लक्ष्मणचा आदर्श घ्यावा असे, प्रसाद यांनी म्हटले आहे. 'संघातून बाहेर ठेवल्याबद्दल आम्ही त्याला कळवले होते. तो चांगला खेळाडू आहे, त्याला खुप संधी मिळाल्या. मात्र, काही सामन्यांत त्याच्याकडून योग्य कामगिरी झाली नाही. जेव्हा लक्ष्मणला कसोटी संघातून वगळण्यात आले, तेव्हा त्याने रणजीच्या एका हंगामात १४०० धावा काढल्या होत्या. या कामगिरीच्या बळावर त्याने संघात दमदार पुनरागमन केले होते. राहुलनेही हेच केले पाहिजे', असे प्रसाद पत्रकारांशी बोलत असताना म्हणाले.