मेलबर्न - ऑस्ट्रेलियाचा सलामीवीर अ‌ॅरान फिंचने एकदिवसीय सामन्यामध्ये आपल्या स्फोटक फलंदाजीचा नजराणा दाखवत नाबाद १८८ धावा चोपल्या. फिंचचे आक्रमक रुप पाहून गोलंदाज हतबल झाल्याचे दिसून आले. ऑस्ट्रेलियात सुरू असलेल्या मार्श चषक एकदिवसीय स्पर्धेत फिंचने मंगळवारी व्हिक्टोरिया संघाचे प्रतिनिधीत्व करताना ही वादळी खेळी केली.
व्हिक्टोरिया विरुध्द क्विन्सलँड या संघात झालेल्या सामन्यात फिंचने हा कारनामा करत संघाला एकतर्फा विजय मिळवून दिला. क्विन्सलँड संघाने प्रथम फलंदाजी करत व्हिक्टोरियाला निर्धारीत ५० षटकात ३०५ धावांचे लक्ष्य दिले होते. व्हिक्टोरिया संघाने हे लक्ष्य ४४.२ षटकात एका गड्याच्या मोबदल्यात पूर्ण केले. फिंचने या सामन्यात १५१ चेंडूत नाबाद १८८ धावांची खेळी केली. त्याने अर्धशतक २९ चेंडूत तर शतक ७३ चेंडूत पूर्ण केले.