दुबई - भारत आणि ऑस्ट्रेलिया यांच्यातील सिडनी कसोटी सामना संपल्यानंतर आयसीसीने मंगळवारी ताजी कसोटी क्रमवारी जाहीर केली आहे. ताज्या क्रमवारीनुसार, भारताचा कर्णधार विराट कोहलीला फलंदाजांच्या क्रमवारीतील दुसरे स्थान गमवावे लागले आहे. याशिवाय रहाणे, अश्विन आणि बुमराह यांना देखील फटका बसल्याचे दिसून येत आहे.
विराट पत्नी अनुष्काच्या बाळंतपणासाठी ऑस्ट्रेलिया दौऱ्यातील पहिल्या कसोटीनंतर मायदेशी परतला आहे. याचा फटका त्याला बसला आहे. त्याची तिसऱ्या स्थानी घसरण झाली आहे. न्यूझीलंडचा कर्णधार केन विल्यमसनने अव्वल स्थान कायम राखले आहे. तर ऑस्ट्रेलियाचा फलंदाज स्टिव्ह स्मिथ दुसऱ्या स्थानावर सरकला आहे.
इंग्लंडचा अष्टपैलू खेळाडू बेन स्टोक्सला दोन स्थानाचा फायदा झाला आहे. तो सहाव्या क्रमाकावर पोहोचला आहे. अजिंक्य रहाणेची एका स्थानाने घसरण झाली असून तो सातव्या स्थानी आहे. चेतेश्वर पुजाराची क्रमवारी सुधारली असून तो १०व्या स्थानावरून ८ व्या स्थानी पोहोचला आहे.