नवी दिल्ली - भारताचे सर्वात जुने स्टेडीयम म्हणून ओळखले जाणारे फिरोज शाह कोटला स्टेडीयमचे नाव आता माजी मंत्री अरुण जेटली यांच्या नावाने ओळखले जाणार आहे. दिल्ली क्रिकेट संघाचे (डीडीसीए) अध्यक्ष रजत शर्मा यांनी जवाहरलाल नेहरू स्टेडीयम येथे आयोजित कार्यक्रमात सांगितले. तसेच जेटली स्टेडीयमच्या एका पॅवेलीयनला भारतीय क्रिकेट संघाचा कर्णधार विराट कोहलीचे नाव देण्यात आले आहे. प्रशिक्षक रवी शास्त्री यांनाही यावेळी सन्मानित करण्यात आले.
हेही वाचा - कधी वाटलं नव्हतं की एवढा मोठा सन्मान मिळेल - विराट कोहली
डीडीसीएने आयोजित केलेल्या या समारंभात केंद्रीय गृहमंत्री अमित शाह, क्रीडामंत्री किरण रिजीजू, रेल्वेमंत्री पीयूष गोयल, राजवर्धन राठोड तसेच बीसीसीआयचे मान्यवर यावेळी उपस्थित होते. दक्षिण आफ्रिकेविरूद्ध टी-२० सामन्यासाठी निवडला गेलेला भारताचा संघही या कार्यक्रमात उपस्थित होता. तसेच भारताचे कर्णधार कपील देव, अजय जडेजा, अतुल वासन हेही यावेळी हजर होते. अरुण जेटली यांचे कुटुंबसुद्धा कार्यक्रमाला उपस्थित होते.