नवी दिल्ली - माजी क्रिकेटपटू युवराज सिंगने कोरोना व्हायरसशी लढण्यासाठी दिल्ली सरकारकडे मदतीचा हात दिला आहे. युवराजने दिल्ली सरकारला १५ हजार एन-९५ मास्क दिले आहेत. कठीण काळातील या सहकार्याबद्दल दिल्लीचे मुख्यमंत्री अरविंद केजरीवाल यांनी युवराजचे आभार मानले आहेत. त्याचबरोबर कर्करोगावर युवराजचा विजय हा आजच्या युगातील प्रत्येकासाठी प्रेरणादायी आहे, असे केजरीवाल यांनी म्हटले आहे.
युवराज आणि त्यांच्या संस्थेने दिल्ली सरकारला हे मास्क उपलब्ध केले आहेत. हे मास्क विविध रुग्णालयात कोरोना रूग्णांवर उपचार करणार्या डॉक्टर आणि नर्सेस यांना देण्यात येणार आहेत. दिल्ली सरकारने यापूर्वी वैद्यकीय कर्मचार्यांना सुरक्षा पुरवण्यासाठी पीपीई किट नसल्याचे सांगितले होते. वैद्यकीय कर्मचार्यांच्या सुरक्षेसाठी पीपीई किट देण्याची मागणी दिल्ली सरकारने केंद्र सरकारकडे केली होती.